Մետրոյի նոր կայարանը նախատեսվում է տեղակայել Հրազդան գետի վրա կառուցվելիք կամրջի վրա. ԷՍՔԻԶՆԵՐ

ԵՐԵՎԱՆ, 29 հոկտեմբերի./Նովոստի–Արմենիա/. Մետրոյի նոր կայարանը նախատեսվում է տեղակայել Հրազդան գետի վրա կառուցվելիք կամրջի վրա։ 

Այս մասին Facebook–յան իր էջում նշել է Երևանի քաղաքապետարանի մամուլի խոսնակ Հակոբ Կարապետյանը` հրապարակելով նոր կայարանի էսքիզները։

«Երևանի մետրոպոլիտենի Աջափնյակ (անվանումը պայմանական է) կայարանի էսքիզային առաջարկ է: Այն նախատեսում է կայարանը տեղակայել Հրազդան գետի վրա կառուցվելիք կամրջի վրա, ինչը հնարավորություն կտա մետրո մուտք գործել/դուրս գալ ձորի աջ և ձախ կողմերից էլ՝ Հալաբյանից (Թումոյի մոտ) ու Կիևյանի հատվածից (Բարբյուս փ.)։ Այս տարբերակը ենթադրում է նաև մետրոպոլիտենի զարգացումը Աջափնյակ-Դավթաշեն ուղղությամբ՝ ավելի երկարաժամկետ հեռանկարով», – նշել է Կարապետյանը։

Նրա խոսքով, նախագիծն իրագործելու համար ինտենսիվ բանակցություններ են ընթանում ներդրողների հետ։

«Ձեռք բերված պայմանավորվածությունների մասին կտեղեկացնենք լրացուցիչ», – հայտնել է Երևանի քաղաքապետարանի մամուլի խոսնակը: 

Նշենք, որ այսօր Երևանի փոխքաղաքապետ Հայկ Սարգսյանը նշել է, որ Երևանի մետրոպոլիտենի նոր կայարանի շինարարությունը, հնարավոր է, մեկնարկի 2020թ.–ի գարնանը։–0–