Միջազգային օլիմպիական կոմիտեն հետևում է ՀԱՕԿ–ի շուրջ ստեղծված իրավիճակին՝ փորձելով գտնել լուծումներ

ԵՐԵՎԱՆ, 16 հուլիսի․/Նովոստի–Արմենիա/․ Միջազգային օլիմպիական կոմիտեում (ՄՕԿ) հայտարարել են, որ տեղյակ են գործարար և քաղաքական գործիչ Գագիկ Ծառուկյանի գլխավորած Հայաստանի ազգային օլիմպիական կոմիտեի (ՀԱՕԿ) շուրջ ստեղծված իրավիճակից։

ՄՕԿ մամուլի ծառայությունից «Ազատություն» ռադիոկայանի գրավոր հարցմանն ի պատասխան հայտնել են, որ կապի մեջ են հայաստանյան կառույցի հետ և փորձում են լուծումներ գտնել։

«ՄՕԿ-ն ուշադիր դիտարկում է բոլոր հանգամանքները և փորձում է պատշաճ լուծումներ գտնել՝ պաշտպանելու ՀԱՕԿ-ը՝ որպես կառույց և երաշխավորելու Հայաստանում Օլիմպիական շարժման ու մարզիկների շահերը»,- նշել են ՄՕԿ-ի մամուլի ծառայությունից:

Թե ինչ լուծումներ են դիտարկվում, միջազգային կառույցը չի բացահայտել:

ՀԱՕԿ շենքը և «Օլիմպավան» մարզահամալիրը, որը հանդիսանում է կոմիտեի մարզաբազան, կապարակնքվել են Գագիկ Ծառուկյանի կալանավորումից հետո։ Իրավապահ մարմինները պաշտոնապես չեն պարզաբանել Օլիմպիական կոմիտեի աշխատանքի կասեցման պատճառները և չեն հայտնել, թե ինչ քննչական գործողություններ են իրականացվում կազմակերպությունում։

Ծառուկյանը կալանավորվել է հուլիսի 7-ին՝ երկու ամիս ժամկետով, առանձնապես խոշոր չափերի խարդախության և փողերի լվացման քրեական գործի շրջանակում։ Ծառուկյանն ու նրա փաստաբանները հերքում են մեղադրանքները։

Կարդացեք նաև․ Ծառուկյանի Multi Wellness մարզասրահի շենքն անցել է քաղաքապետարանին, շարունակելու է գործել․ Ավինյան