Ինչպե՞ս ունենալ գեղեցիկ և անվտանգ արևայրուք. Խորհուրդներ

ԵՐԵՎԱՆ, 16 հուլիսի․/Նովոստի–Արմենիա/․ Ամառը, ծովը և արևը շատերի համար անբաժան են։

Եթե ցանկանում եք ունենալ գեղեցիկ արևայրուք, կարևոր է հիշել, որ այն պետք է ստանալ աստիճանաբար՝ առանց մաշկին վնաս պատճառելու։ 

Հիվանդությունների վերահսկման և կանխարգելման ազգային կենտրոնը նշում է, որ արևի ուլտրամանուշակագույն ճառագայթների չափազանց երկար ազդեցությունը կարող է վնասել մաշկը, ուստի արևայրուք ընդունելիս պետք է հետևել մի քանի պարզ կանոնների.

• Արևայրուք ընդունել աստիճանաբար։ Առաջին օրերին արևի տակ մնալ 15-20 րոպե, այնուհետև աստիճանաբար ավելացնել ժամանակը։

• Նախընտրել արևայրուք ընդունել մինչև ժամը 11:00-ը կամ 17:00-ից հետո, երբ արևի ճառագայթների ինտենսիվությունն ավելի ցածր է։

• Օգտագործել SPF 30 և ավելի բարձր պաշտպանությամբ արևապաշտպան միջոցներ։ Արևապաշտպան քսուքը քսել արևի տակ դուրս գալուց 15-20 րոպե առաջ և կրկնել յուրաքանչյուր 2 ժամը մեկ, ինչպես նաև յուրաքանչյուր անգամ լողալուց հետո։

•  Չմոռանալ խմել բավարար քանակությամբ ջուր, քանի որ արևի տակ օրգանիզմն ավելի արագ է կորցնում հեղուկը։

• Գլխարկն ու արևային ակնոցը նույնպես կարևոր են, նույնիսկ եթե ցանկանում եք արևայրուք ունենալ։

Եթե նկատում եք, որ մաշկը սկսում է կարմրել կամ առաջանում է այրոցի զգացում, տեղափոխվեք ստվեր և դադարեցրեք արևայրուք ընդունելը։ Դա նշան է, որ մաշկն արդեն ստացել է առավելագույն անվտանգ ազդեցությունը։ Հիշե՛ք՝ գեղեցիկ արևայրուքը ստացվում է ոչ թե երկար ժամերով արևի տակ մնալու, այլ ճիշտ և անվտանգ արևայրուք ընդունելու շնորհիվ։