ԱԽ քարտուղարն ընդունել է ԵՄ գործընկերության նոր առաքելության ղեկավարին՝ կարևորելով կառույցի աջակցությունը կիբեռհարձակումների դեմ պայքարում
ԵՐԵՎԱՆ, 16 հուլիսի․/Նովոստի–Արմենիա/․ Հուլիսի 16-ին ՀՀ ԱԽ քարտուղար Արմեն Գրիգորյանն ընդունել է Հայաստանում Եվրոպական միության գործընկերության առաքելության նորանշանակ ղեկավար, դեսպան Կոսմին Ջորջ Դինեսկուին, հայտնում է Անվտանգության խորհրդի մամուլի ծառայությունը։
ԱԽ քարտուղարը ողջունել է Հայաստանում ԵՄ նոր քաղաքացիական առաքելության տեղակայումը՝ ընդգծելով հայկական կողմի հանձնառությունը՝ աջակցելու առաքելության մանդատից բխող միջոցառումների արդյունավետ իրականացմանը։
Արմեն Գրիգորյանը կարևորել է նաև առաքելության դերն ու աջակցությունն ապատեղեկատվության, կիբեռհարձակումների և ապօրինի ֆինանսական հոսքերի դեմ պայքարում։
Հանդիպման ընթացքում զրուցակիցները քննարկել են նաև համագործակցության հետագա ուղղություններն ու փոխգործակցության զարգացման հնարավորությունները։
Առաքելության մասին
Եվրոպական միության խորհուրդը հուլիսի 13–ին պաշտոնապես գործարկել է նոր առաքելություն՝ Անվտանգության և պաշտպանության ընդհանուր քաղաքականության (CSDP) շրջանակում՝ ԵՄ գործընկերության առաքելությունը Հայաստանում (EUPM Armenia):
Խորհրդատվական քաղաքացիական առաքելության նպատակն է աջակցություն ցուցաբերել հայաստանյան իշխանություններին հիբրիդային սպառնալիքների նկատմամբ երկրի դիմակայունության ամրապնդման և անվտանգության փոփոխվող մարտահրավերներին արձագանքելու կարողությունների բարձրացման գործում:
Առաքելությունը, որը պաշտոնապես հիմնադրվել է 2026 թվականի ապրիլի 21-ին, կնպաստի հիբրիդային սպառնալիքների հակազդման գործում Հայաստանի ներուժի զարգացմանը, ներառյալ՝ կիբեռսպառնալիքները, օտարերկրյա տեղեկատվական մանիպուլյացիաներն ու միջամտությունը (FIMI), ինչպես նաև ապօրինի ֆինանսական հոսքերը:
