Հայաստանը կպահպանի լիարժեք վերահսկողությունը սահմանի կառավարման և մաքսային վարչարարության նկատմամբ TRIPP-ի շրջանակում. Միրզոյան
ԵՐԵՎԱՆ, 16 հուլիսի. /Նովոստի-Արմենիա/. Հայաստանը կպահպանի լիարժեք ինքնիշխանությունն ու իրավազորությունը պետական սահմանի կառավարման, սահմանային վերահսկողության, մաքսային վարչարարության և Հայաստանի տարածքում իրականացվող բոլոր մաքսային գործընթացների նկատմամբ «Թրամփի ուղի հանուն միջազգային խաղաղության և բարգավաճման» (TRIPP) նախագծի իրականացման ժամանակ, հինգշաբթի հայտարարել է ՀՀ ԱԳ նախարար Արարատ Միրզոյանը։
ՀՀ կառավարությունը հինգշաբթի կայացած նիստում հավանություն է տվել TRIPP նախագծի վերաբերյալ ռազմավարական համագործակցության մասին ԱՄՆ-ի հետ շրջանակային համաձայնագրի վավերացման մասին օրինագծին։
«Հայաստանը կպահպանի լիակատար ինքնիշխանությունը և իրավազորությունը պետական սահմանի կառավարման, սահմանային վերահսկողության և մաքսային վարչարարության հարցերում, ներառյալ բոլոր մաքսային ընթացակարգերը ՀՀ տարածքում TRIPP նախագծի շրջանակում», - ասել է Միրզոյանը։
Նրա խոսքով՝ գործընթացի վերջնական փաստաթղթային ձևակերպման համար անհրաժեշտ է համաձայնեցնել ևս երկու փաստաթուղթ՝ բաժնետերերի միջև պայմանագիրը և TRIPP-ի զարգացման ընկերության կանոնադրությունը։
«Ներկայումս աշխատանքներ են տարվում այդ փաստաթղթերի վրա։ Համաձայնագիրն ամրագրում է Հայաստանի և ԱՄՆ-ի մտադրությունը՝ նպաստելու Հարավային Կովկասում խաղաղության ամրապնդմանը տրանսպորտային ենթակառուցվածքների, տարածաշրջանային և համաշխարհային առևտրի զարգացման միջոցով», - նշել է նախարարը։
Միրզոյանը հայտնել է, որ Հայաստանը և ԱՄՆ-ն կստեղծեն TRIPP-ի զարգացման ընկերություն. այն կկարողանա ՀՀ տարածքում հիմնադրել մասնագիտացված ընկերություններ առանձին նախագծերի իրականացման համար և ներգրավել գործընկերներ։
Նրա խոսքով՝ ընկերությունը համապատասխան գոտիներում հողատարածքների օգտագործման և կառուցապատման իրավունքներ կստանա նախնական 49 տարի ժամկետով։
«Այդ ժամանակահատվածում ընկերության բաժնետոմսերի 74%-ը կպատկանի ԱՄՆ-ին, 26%-ը՝ Հայաստանին։ 49 տարին լրանալուց հետո կողմերը կարող են փոխադարձ համաձայնությամբ երկարաձգել համագործակցությունը ևս 50 տարով։ Երկարաձգման դեպքում Հայաստանի մասնաբաժինը պետք է կազմի 49%», - ասել է Միրզոյանը։
TRIPP ծրագրի մասին
Հայաստանի ԱԳՆ-ն հունիսի 4-ին հայտնել էր TRIPP-ի վերաբերյալ Հայաստանի և ԱՄՆ-ի միջև շրջանակային համաձայնագրի ստորագրման մասին, որը նախաստորագրվել էր մայիսի 26-ին՝ ԱՄՆ պետքարտուղարի Երևան կատարած այցի շրջանակում։
Մեկ օր առաջ ԱՄՆ Միջազգային զարգացման ֆինանսական կորպորացիայի (DFC) տնօրենների խորհուրդը հավանություն էր տվել TRIPP Development Company-ի՝ ԱՄՆ-ի և Հայաստանի համատեղ ձեռնարկության ստեղծմանը։ Նախագիծը ներառված է DFC-ի 2,5 միլիարդ դոլարի նոր ռազմավարական ներդրումների փաթեթում։
TRIPP Development Company-ն պետք է նպաստի կովկասյան տարածաշրջանում առևտրի, տրանսպորտի և տնտեսության զարգացմանը, ինչպես նաև միջազգային, միջպետական և ներպետական տրանսպորտային կապվածության ընդլայնմանը։
Ավելի վաղ ՀՀ իշխանությունները հայտարարել էին, որ TRIPP Development Company-ն կստանա նախագծի իրականացման նախնական իրավունք՝ 49 տարի ժամկետով։ Նախատեսվում է ԱՄՆ-ին առաջարկել համատեղ ձեռնարկության բաժնետոմսերի 74%-ը, իսկ Հայաստանին կմնա 26%-ը։ Համաձայնագիրը ևս 50 տարով երկարաձգվելու դեպքում նախատեսվում է փոխել բաժնեմասերի հարաբերակցությունը։
