ՌԴ–ում նախատեսում են պարտադրել միգրանտներին ձեռք բերել բջջային հեռախոս՝ էլեկտրոնային պրոֆիլով
ԵՐԵՎԱՆ, 15 հուլիսի․/Նովոստի–Արմենիա/․ Ռուսաստան երկարաժամկետ կամ աշխատանքի նպատակով ժամանող օտարերկրյա քաղաքացիներին հեռանկարում կարող են պարտադրել ձեռք բերել բջջային հեռախոս՝ էլեկտրոնային պրոֆիլով, հայտարարել է ՌԴ ներքին գործերի նախարարի տեղակալ-պետքարտուղար Իգոր Զուբովը, հաղորդում է РБК-ն:
Նրա խոսքով՝ նման համակարգը ՆԳՆ-ին թույլ կտա տվյալներ ստանալ միգրանտների գտնվելու վայրի մասին և վերահսկել նրանց կողմից կեցության վայրի փոփոխությունը:
«Յուրաքանչյուր միգրանտ գրանցվելիս, ով գալիս է այստեղ, հատկապես աշխատանքային նպատակով կամ երկար ժամանակով, պարտավոր կլինի հեռախոս ձեռք բերել: Այդ հեռախոսում կլինի նրա էլեկտրոնային պրոֆիլը»,- հայտարարել է Զուբովը Դաշնային խորհրդի միջազգային գործերով կոմիտեի նիստում։
Նա հավելել է, որ հեռախոսի միջոցով օտարերկրացիներին հնարավոր կլինի ծանուցումներ ուղարկել փաստաթղթերի գործողության ժամկետի ավարտի կամ պետական մարմին ներկայանալու անհրաժեշտության մասին:
2025 թվականի սեպտեմբերի 1-ից Մոսկվայում և Մոսկվայի մարզում թեստավորվում է «Ամինա» բջջային հավելվածը, որը ՆԳՆ-ին է փոխանցում օգտատիրոջ գեոլոկացիայի (տեղորոշման) տվյալները: Դրա օգտագործումը պարտադիր է առանց վիզայի ռեժիմով Ռուսաստան ժամանող չափահաս օտարերկրացիների համար։
ՆԳՆ տվյալներով՝ դեկտեմբերի կեսերին ավելի քան 139 հազար մարդ հանվել է միգրացիոն հաշվառումից՝ հավելվածում գեոտվյալների բացակայության պատճառով։ Հաշվառումից հանումը տեղի է ունենում, եթե օգտատիրոջ գտնվելու վայրի մասին տեղեկությունները համակարգ չեն մուտքագրվում ավելի քան երեք աշխատանքային օրվա ընթացքում, նշում է РБК-ն:
