Հայտնի է կյանքի համար ամենահարմարավետ քաղաքն աշխարհում
ԵՐԵՎԱՆ, 11 հուլիսի․/Նովոստի–Արմենիա/․ Կոպենհագենը երկրորդ տարին անդընդմեջ ճանաչվել է կյանքի համար ամենահարմարավետ քաղաքն աշխարհում՝ The Economist ամսագրի հետազոտական ստորաբաժանման՝ Economist Intelligence Unit-ի (EIU) վարկածով, գրում է CNN travel-ը:
Դանիայի մայրաքաղաքը երկրորդ տարին անընդմեջ առաջ է անցել Վիեննայից, որը մինչ այդ երեք տարի անդընդմեջ զբաղեցնում էր առաջին տեղը ամենամյա վարկանիշում:
EIU-ն գնահատել է աշխարհի 173 քաղաք մի շարք չափանիշներով, այդ թվում՝ կրթությունը, կայունությունը, առողջապահությունը, ենթակառուցվածքները և մշակույթը:
Կոպենհագենը առավելագույն գնահատականներ է ստացել միանգամից երեք անվանակարգերում՝ կայունություն, ենթակառուցվածքներ և կրթություն:
Կյանքի համար աշխարհի ամենահարմարավետ քաղաքների լավագույն տասնյակում (top-10) ներառվել են Կոպենհագենը (Դանիա), Վիեննան (Ավստրիա), Մելբուռնը (Ավստրալիա), Սիդնեյը (Ավստրալիա), Ցյուրիխը (Շվեյցարիա), Ժնևը (Շվեյցարիա), Օսական (Ճապոնիա), Ադելաիդան (Ավստրալիա), Վանկուվերը (Կանադա) և Տոկիոն (Ճապոնիա):
