Հենրիխ Մխիթարյանը պարզաբանել է, թե ինչու չի ցանկանում փոխել «Ինտերը» փողի հետ և նշել է կարիերան շարունակելու գլխավոր պայմանը
ԵՐԵՎԱՆ, 12 հոկտեմբերի․/Նովոստի–Արմենիա/․ Հայաստանի ազգային հավաքականի նախկին ավագ, Միլանի «Ինտերի» կիսապաշտպան Հենրիխ Մխիթարյանը հայտարարել է, որ դեռ պատրաստ չէ խոսել իր մասնագիտական կարիերայի ապագայի մասին:
Նրա խոսքով՝ ակումբ ընտրելիս իր համար ավելի կարևոր են մարզական հավակնությունները, մոտիվացիան և էմոցիաները, որոնք պարգևում է ֆուտբոլը, այլ ոչ թե ֆինանսական պայմանները:
Այս մասին ֆուտբոլիստը պատմել է Հայաստանի Հանրային հեռուստաընկերությանը տված հատուկ հարցազրույցում:
Պետք է օրեցօր առաջ շարժվել
Մխիթարյանը նշել է, որ տարիքի հետ ծանրաբեռնվածությունից հետո վերականգնվելն ավելի է դժվարանում, դրա համար էլ ինքը նախընտրում է հեռու գնացող ծրագրեր չկազմել:
«Ես ոչինչ չեմ կարող խոստանալ: Ես գտնվում եմ այնպիսի տարիքում, երբ չարժե չափազանց հեռու գնացող ծրագրեր կազմել: Պետք է առաջ շարժվել օրեցօր և մտածել վաղվա օրվա մասին, որովհետև վերականգնվելն այնքան էլ հեշտ չէ: Հեշտ չէ քո առջև նպատակներ դնելն ու մարզվել այնպես, ինչպես մարզվում են թիմակիցներդ 20–22 տարեկանում», — ասել է ֆուտբոլիստը:
Նրա խոսքով՝ ինքը փորձում է ներդնել առավելագույնը, սակայն չի կարող հստակ ասել, թե դեռ որքան կխաղա բարձր մակարդակում:
Մխիթարյանը՝ փողի և ազարտի մասին
«Փողն ինձ համար երբեք առաջնային չի եղել: Ես երբեք չեմ խաղացել փողի համար և ակումբից ակումբ չեմ տեղափոխվել վաստակելու նպատակով: Ես խաղացել եմ իմ ամբիցիաների, նպատակների և երազանքների համար, որոնք ունեցել եմ մանկուց», — ընդգծել է Մխիթարյանը:
Նրա խոսքով՝ կարիերան շարունակելու ամենակարևոր պայմանը մնում է խաղերից առաջ ազարտ և էմոցիոնալ լարվածություն զգալու հնարավորությունը:
«Ինձ համար ամենակարևորն առավոտյան արթնանալն ու ներքին կրակը զգալն է, իմանալը, որ շաբաթ, կիրակի կամ շաբաթվա մեջտեղում քեզ սպասվում է խաղ, որը լարվածություն ու ադրենալինի արտանետում է առաջացնում: Ես չեմ ուզում առավոտյան արթնանալ Սաուդյան Արաբիայում, MLS-ում կամ նույնիսկ Հայաստանում և մտածել, որ ուղղակի գնում եմ աշխատանքի: Եթե չկան ադրենալինն ու էմոցիաները, ֆուտբոլն ինձ համար դառնում է սովորական աշխատանք», — հայտարարել է նա՝ հավելելով, որ չի դիտարկում Սաուդյան Արաբիայի առաջնություն տեղափոխվելը:
Հայաստան վերադառնալու մասին
Ֆուտբոլիստը նշել է, որ հնարավոր վերադարձը Հայաստան իր համար հատուկ դեպք կլիներ:
«Եթե խոսենք Հայաստանի մասին, ապա այստեղ ամեն ինչ այլ է: Եթե ես տեղափոխվեի Հայաստան՝ ֆուտբոլ խաղալու, դա կլիներ ուղղակի վերադարձ տուն: Դա արդեն այլ թեմա է: Այնուամենայնիվ, հանդես գալով «Ինտերի» պես մեծ ակումբում՝ ես քիչ հավանական եմ համարում տեղափոխությունն անմիջապես Հայաստան: Հենց այդ պատճառով էլ ես ինձ համար բացառում եմ նման տարբերակը», — նշել է նա:
Առօրյայի մասին
Ֆուտբոլիստը նաև պատմել է իր առօրյա ռեժիմի մանրամասները: Նրա խոսքով՝ առավոտյան ինքն օգնում է երեխաներին պատրաստվել դպրոցին և ինքն է նրանց տանում այնտեղ, որից հետո ուղևորվում է մարզաբազա:
Այնտեղ նա անցկացնում է մոտ հինգ-վեց ժամ, իսկ անհրաժեշտության դեպքում լրացուցիչ 15–30 րոպե տրամադրում է անհատական աշխատանքին և վերականգնմանը:
Մարզումներից հետո Մխիթարյանը երեխաներին վերցնում է դպրոցից, վերադառնում տուն, ժամանակ անցկացնում նրանց հետ և հանգստանում:
