ԵՐԵՎԱՆ, 27 փետրվարի./Նովոստի–Արմենիա/. Հեռուստաաստղ և մոդել Քիմ Քարդաշյանը ռեփեր Քանյե Ուեսթից ամուսնալուծվելու հայտ է ներկայացրել։ Այս մասին հաղորդում է Reuters–ը`հղում անելով Լոս Անջելեսի դատարանի ներկայացուցիչներին։
TMZ պորտալը, հղում անելով աղբյուրներին, գրում է, որ զույգը պայմանավորվել է երեխաների համատեղ խնամակալության հարցում։ Հրատարակության տվյալներով, Քիմն ու Քանյեն մտադիր չեն բողոքարկել ամուսնական պայմանագրի կետերը։ Ամուսինները հասել են «զգալի առաջընթացի» ունեցվածքի հետ կապված վեճերի կարգավորման ճանապարհին, գրում է ՌԲԿ–ն։
Քիմ Քարդաշյանն ու Քանյե Ուեսթն ամուսնացել են 2014թ.–ին։ Զույգն ունի չորս երեխա։ Հունվարին Page Six ամերիկյան տաբլոիդը հաղորդել էր, որ Քարդաշյանն ու Ուեսթը որոշել են ամուսնալուծվել։ Հրատարակության տվյալներով, Քարդաշյանը վարձակալել է ամուսնալուծության հարցերով զբաղվող փաստաբան Լորա Վասերին, որն ավելի վաղ ամուսնալուծության գործընթացներում ներկայացրել է ամերիկացի այլ աստղերի, այդ թվում` Անջելինա Ջոլիին, Բրիթնի Սփիրսին և Ջոնի Դեփին։
Տաբլոիդի տվյալներով, զույգի հարաբերություններում դժվարությունները սկսվել են 2020թ.–ին, երբ Քանյե Ուեսթը հայտարարեց, որ որոշել է իր թեկնածությունն առաջադրել ԱՄՆ նախագահի պաշտոնում։ Այդ ժամանակ TMZ հրատարակությունը, հղում անելով Ուեսթի ընտանիքին մոտ կանգնած աղբյուրներին, հաղորդեց, որ Քանյեի մոտ երկբևեռ աֆեկտիվ խանգարում է, որի ժամանակ դեպրեսիային հաջորդում է մանիան, ռեփերը 2018թ.–ին նշում էր, որ տառապում է հոգեկան հիվանդությամբ։
Ընտրական քարոզարշավի ընթացքում Ուեսթը դեմ հանդես եկավ հղիության արհեստական ընդհատմանը, Քարդաշյանը նրան չաջակցեց այդ հարցում։ Տարեվերջին Քիմը դադարեց կրել ամուսնական մատանին, Քանյեն ամանորյա տոներն անցկացրեց ոչ թե ընտանիքի հետ, այլ Վայոմինգում գտնվող իր տանը, հայտնում է Page Six–ը։
Քարդաշյանի հետ ամուսնությունն առաջինն է Ուեսթի համար, իսկ Քիմի համար` երրորդը։ Մինչ այդ Քիմն ամուսնացած է եղել բասկետբոլիստ Քրիս Համֆրիսի և պրոդյուսեր Դեյմոն Թոմասի հետ։
Forbes–ի տվյալներով, Քարդաշյանի ունեցվածքը գնահատվում է 780մլն դոլար, Ուեսթինը`
1,3մլրդ դոլար։ Ըստ Forbes–ի, Ուեսթը զբաղեցնում է աշխարհի 100 ամենաբարձր վարձատրվող
աստղերի վարկանիշի երկրորդ հորիզոնականը։ Առաջին տեղում է Քայլի Ջեները` Քիմ Քարդաշյանի
կրտսեր քույրը։–0–
