Հայաստանի բնակիչների համար գազի գինը չի փոխվի 2018 թ.–ին

ԵՐԵՎԱՆ, 30 նոյեմբերի. /Նովոստի Արմենիա/. Հայաստանի կառավարությունը հինգշաբթի կայացած նիստում հավանություն է տվել ռուսական կողմի հետ ստորագրվելիք արձանագրությանը, համաձայն որի 2018 թվականին կպահպանվի Հայաստան մատակարարվող ռուսական գազի գինը` 150 դոլար հազար խորանարդ մետր գազի համար։

Ինչպես որոշման նախագիծը ներկայացնելիս ասաց ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանը, փաստաթղթով նախատեսվում է հավանություն տալ «Հայաստան բնական գազի մատակարարման գների ձևավորման կարգի մասին» 2013 թ.–ի դեկտեմբերի 2–ի հայ–ռուսական միջկառավարական համաձայնագրում նախատեսված փոփոխությունների արձանագրության ստորագրմանը։

Արձանագրությունը նախատեսում է, որ Հայաստան մատակարարվող ռուսական գազի գինը 2018 թվականի հունվարի 1–ից դեկտեմբերի 31–ը կսահմանվի 150 դոլար 1000 խորանարդ մետր գազի համար։
 

«Վերջերս Երևան կատարած այցի և երկու երկրների վարչապետների հանդիպման ժամանակ պայմանավորվածություն է ձեռք բերվել, ըստ որի Հայաստան մատակարարվող գազի գինը մնում է անփոփոխ։ Այդ փոփոխությունն ամրագրվում է այդ համաձայնագրում, որով նախատեսվում է, որ մինչև 2018 թ.–ի վերջ Հայաստան մատակարարվող գազի գինը կմնա անփոփոխ», – ասաց Մանուկյանը։

Ընդունված որոշման կապակցությամբ վարչապետ Կարեն Կարապետյանն ընդգծեց, որ պահմանվում են բոլոր տարբերակված մոտեցումները սոցիալապես անապահով խմբերի, վերամշակող ձեռնարկությունների, ջերմոցային տնտեսությունների և սահմանամերձ գյուղերի համար նախատեսված գազի վճարումների մասով։

Կառավարության մեկ այլ որոշման համաձայն, հավանություն է տրվել նաև «ՀայՌուսԳազպրոմ» ՓԲԸ–ի (ներկայիս` «Գազպրոմ–Արմենիա») բաժնետոմսերի առուվաճառքի պայմանների և հետագա գործունեության հայ–ռուսական համաձայնագրում նախատեսված փոփոխություններին, ըստ որոնց «ՀայՌուսԳազպրոմ» ՓԲԸ–ի կանոնադրական կապիտալում «Գազպրոմ» ԲԲԸ–ի մասնաբաժինը 80%–ից հասել է 100%–ի։–0–