Թուրքիայի հատուկ ներկայացուցիչն ուղղակի առևտրի մեկնարկն անվանել է նոր քայլ Հայաստանի հետ խաղաղության ճանապարհին
ԵՐԵՎԱՆ, 13 մայիսի․/Նովոստի–Արմենիա/․ Հայաստանի հետ հարաբերությունների կարգավորման հարցերով Թուրքիայի հատուկ ներկայացուցիչ Սերդար Քըլըչը հայտարարել է, որ երկու երկրների միջև ուղղակի առևտրի մեկնարկը նոր կարևոր քայլ է տարածաշրջանում ամուր խաղաղության և կայունության հաստատման ճանապարհին:
«Թուրքիայի և Հայաստանի միջև հարաբերությունների կարգավորման գործընթացի շրջանակում, որը մենք շարունակում ենք մեր նախագահի հանձնարարությամբ, ևս մեկ կարևոր քայլ է արվել տարածաշրջանում ամուր խաղաղության և կայունության հաստատման համար։ Մաղթում եմ, որ դա օգուտ բերի տարածաշրջանի բոլոր գործարարներին և ժողովուրդներին, նախ և առաջ՝ մեր երկու երկրներին», — գրել է Քըլըչը X սոցցանցում:
Այսօր ավելի վաղ ՀՀ Ազգային ժողովի փոխխոսնակ, Թուրքիայի հետ բանակցություններում հատուկ ներկայացուցիչ Ռուբեն Ռուբինյանը հայտնել էր, որ Հայաստանի և Թուրքիայի միջև մաքսային իմաստով ուղիղ՝ առանց վերաձևակերպումների առևտուրը դարձել է հնարավոր։
Մինչ այժմ Թուրքիայի օրենսդրությունը թույլ չէր տալիս արտահանման ժամանակ Հայաստանը նշել որպես նշանակման երկիր։ Արդյունքում Թուրքիայից Հայաստան ուղարկվող ապրանքները նախ ձևակերպվում էին երրորդ երկրների միջոցով, որից հետո միայն ներմուծվում Հայաստան։
Հայ-թուրքական երկխոսության մասին
Հայաստանն ու Թուրքիան չունեն դիվանագիտական հարաբերություններ 1991 թվականից, իսկ երկու երկրների միջև սահմանը փակ է 1993 թվականից՝ Անկարայի նախաձեռնությամբ։ Հիմնական խնդրահարույց հարցերի թվում մնում է Հայոց ցեղասպանության միջազգային ճանաչման գործընթացը։
2021 թվականի դեկտեմբերին հարաբերությունների կարգավորման հատուկ ներկայացուցիչներ նշանակվեցին ՀՀ ԱԺ փոխխոսնակ Ռուբեն Ռուբինյանը և ԱՄՆ-ում Թուրքիայի նախկին դեսպան Սերդար Քըլըչը:
2023 թվականի հունվարի 1-ից երկրների միջև հնարավոր դարձան ուղիղ օդային բեռնափոխադրումները։
2024 թվականի սեպտեմբերի 24-ին Նյու Յորքում Հայաստանի վարչապետ Նիկոլ Փաշինյանը և Թուրքիայի նախագահ Ռեջեփ Թայիփ Էրդողանը վերահաստատեցին առանց նախապայմանների կարգավորումը շարունակելու պատրաստակամությունը։
2025 թվականի ապրիլի 12-ին երկու երկրների ԱԳ նախարարները Անթալիայի դիվանագիտական ֆորումի շրջանակում քննարկեցին երկկողմ օրակարգը, իսկ 2025 թվականի սեպտեմբերի 12-ին Ռուբինյանն ու Քըլըչը Երևանում կայացած հանդիպմանը պայմանավորվեցին արագացնել երրորդ երկրների քաղաքացիների և դիվանագիտական անձնագիր ունեցողների համար ցամաքային սահմանի բացման վերաբերյալ պայմանավորվածությունների իրականացումը, ինչպես նաև երկաթուղու, Գյումրի-Կարս էլեկտրահաղորդման գծի և ավիաչվերթների քանակի ավելացմանն ուղղված նախագծերը։
