Ռուբինյանն անդրադարձել է ԱԺ նախագահի պաշտոնում առաջադրման հարցում Թուրքիայի մասնակցության մասին լուրերին
ԵՐԵՎԱՆ, 3 հուլիսի․/Նովոստի Արմենիա/․Իշխող «Քաղաքացիական պայմանագիր» կուսակցությունից ՀՀ ԱԺ նախագահի թեկնածու, ԱԺ փոխնախագահ և Թուրքիայի հետ բանակցություններում ՀՀ հատուկ ներկայացուցիչ Ռուբեն Ռուբինյանը մեկնաբանել է ԱԺ նախագահի պաշտոնում իր թեկնածությանը Անկարայի մասնակցության մասին լուրերը։
Լուրերը սկսեցին շրջանառվել այն բանից հետո, երբ Հայաստան-Թուրքիա կարգավորման գործընթացում Թուրքիայի հատուկ ներկայացուցիչ Սերդար Քըլըչը շնորհավորեց նրան այդ պաշտոնում առաջադրվելու կապակցությամբ։
«Ինչու՞ չպետք է շնորհավորեր: Նույն կերպ ես ստացել եմ շնորհավորանքներ, օրինակ՝ Ռուսաստանից և այլ տեղերից։Այդ ապուշությունները, իհարկե, կարելի է ասել, բայց դրանք պետք է հիմք ունենան», - ասել է Ռուբինյանը լրագրողների հետ ճեպազրույցի ժամանակ։
Նա նաև հայտարարել է, որ ԱԺ նախագահ ընտրվելու դեպքում չի շարունակելու Թուրքիայի հետ բանակցություններում Հայաստանի հատուկ ներկայացուցիչ լինելը, ինչը բացառում է այն ենթադրությունները, որ ինքը կբանակցի Թուրքիայի հետ։
Նա հայտնել է, որ իր տեղեկություններով դեռ չկա քննարկում, թե ով կփոխարինի նրան այդ պաշտոնում։
Ռուբինյանը նաև հերքել է այն լուրերը, որ ինքը վերապատրաստվել է Թուրքիայում։
«2016-2017 թթ.-երին 5 ամիս մասնակցել եմ Հրանտ Դինքի հիմնադրամի ծրագրին։ 5 ամիս այնտեղ հետազոտություն եմ իրականացրել, որը, ի դեպ, չեմ ավարտել, որովհետև կեսից եկել եմ Հայաստան», - ասել է Ռուբինյանը։
