ԵՐԵՎԱՆ, 25 օգոստոսի. /Նովոստի-Արմենիա/. Ֆրանսահայ հայտնի երգիչ և կոմպոզիտոր Մարտեն Յորգանցը համերգներով հանդես կգա Հայաստանի տարբեր մարզերում, հինգշաբթի լրագրողներին հայտնեց ինքը երգիչը՝ սփյուռքի նախարարությունում կայացած մամուլի ասուլիսի ժամանակ։
«Այս տարի որոշել եմ երեխաների համար մի շարք համերգներ ունենալ մարզերում, քանի որ այնտեղ մշակութային կյանքը պակաս ակտիվ է, քան մայրաքաղաքում, և այնտեղ ապրող երեխաները զուրկ են համերգներին ներկա լինելու հնարավորությունից»,- ասաց Յորգանցը։
Նրա խոսքով` երեխաները իր ոգեշնչման աղբյուրն են, և հենց նրանց է նվիրել իր ստեղծագործական գործունեության մեծ մասը։
«Ինձ համար հատկապես ուրախալի է համերգներիս փոքրիկ երեխաներ տեսնել, ում դուր է գալիս իմ ստեղծագործությունը։ Շատ հաճելի է գիտակցել, որ քո երգերը դասական են դարձել, չնայած, որ դրանք բավականին պարզ ու սովորական են»,- ասաց երգիչը։
Առաջին համերգը կանցկացվի օգոստոսի 25-ին Աղվերանում (Կոտայքի մարզ), որտեղ երաժշիտը կհանդիպի «Արի Տուն» ծրագրի 7-րդ փուլի մասնակիցների հետ, հետո օգոստոսի 27-ին համերգ կկայանա Տավուշի մարզի Բերդ քաղաքում։
Օգոստոսի 30-ին Յորգանցը ելույթ կունենա Վեդիում (Արարատի մարզ), իսկ սեպտեմբերի մեկին՝ Գավառում (Գեղարքունիքի մարզ) և Հրազդանում (Կոտայքի մարզ)։
«Ես շնորհակալ եմ սփյուռքի նախարարությանն աջակցության համար և ուրախությամբ ելույթ կունենամ հայ երեխաների համար, ում կներկայացնեմ ինչպես հին, սիրված հիթեր, այնպես էլ նոր երգեր»,- նշեց երաժիշտը։
Մամուլի ասուլիսում բացի համերգներին ու առաջիկա մշակութային միջոցառումներին անդրադառնալուց, երգիչը խոսեց նաև Հայաստանի համար կարևոր խնդրի՝ միգրացիայի մասին։ «Միգրացիան ինձ համար եղել և մնում է իմ երկրի ամենակարևոր խնդիրներից մեկը։ Ինձ համար տհաճ է գիտակցել, որ մարդիկ կամավոր լքում են Հայաստանը»,- ասաց նա։
Երաժիշտի կարծիքով` Սփյուռքը, Հայաստանի ժողովուրդը և կառավարությունը պետք է միասնական լինեն և փայփայեն իրենց հայրենիքի յուրաքանչյուր մետրը։
Մամուլի ասուլիսի ընթացքում Հայաստանի սփյուռքի նախարար Հրանուշ Հակոբյանի անունից երաժիշտին հայկական մշակույթի զարգացման գործում ունեցած ավանդի և հայկական սփյուռքին ցուցաբերած աջակցության համար դիպլոմ հանձնվեց։ -0-
