Մոսկվայի և Երևանի միջև պայմանավորվածությունները չեն տուժի Լուժկովի հրաժարականի պատճառով. փորձագետ

ԵՐԵՎԱՆ, 28 սեպտեմբերի. /Նովոստի-Արմենիա/. Մոսկվայի և Երևանի միջև պայմանավորվածությունները չեն տուժի Մոսկվայի քաղաքապետ Յուրի Լուժկովի հրաժարականի պատճառով,  երեքշաբթի հայտարարեց փորձագետ Սերգեյ Շաքարյանցը։

Ներկայումս Երևանի և Մոսկվայի միջև մի շարք խոշոր նախագծեր են իրագործվում շինարարության, քաղաքաշինության, կրթության, էներգետիկայի ոլորտներում։

«Կարծում եմ, որ մեկ մարդու կամ մի խումբ պաշտոնատար անձանց հրաժարականից ոչինչ չպետք է կախված լինի, քանի որ Մոսկվայի և Երևանի միջև պայմանավորվածությունները, ինչպես ՌԴ և ՀՀ միջև, հեռանկարային և փոխշահավետ բնույթ են կրում»,- ասաց Շաքարյանցը «Նովոստի-Արմենիա» գործակալությանը։

Մասնավորապես, նա հիշեցրեց վերջին օրինակը, երբ Գյումրիում ռուսական ռազմաբազայի տեղակայման վերաբերյալ երկկողմ պայմանագրի՝ 24 տարով երկարացման մասին արձանագրություն ստորագրվեց։

Ռուսաստանի նախագահ Դմիտրի Մեդվեդևի՝ Հայաստան կատարած պետական այցի (օգոստոսի 19-21) շրջանակներում արձանագրությոն է ստորագրվել Գյումրիում ռուսական ռազմաբազայի տեղակայման վերաբերյալ երկկողմ պայմանագրի երկարացման վերաբերյալ մինչև 49 տարի։

«Նախնական պայմանագիրը ձևակերպվել է այն ժամանակ, երբ առկա էր հակաժողովրդական ՀՀՇ-ն, իսկ Ռուսաստանում Բորիս Ելցինի՝ ներկայումս դատապարտվող ռեժիմը։ Անկախ նրանից, թե որ կուսակցությունն ու անձանց խումբն է իշխանության ղեկին Մոսկվայում կամ Երևանում, երկկողմ բնույթի պայմանավորվածությունները շարունակում են կատարելագործվել և կատարվել, այդ պատճառով էլ կարծում եմ, որ Լուժկովի հրաժարականը չի ազդի Մոսկվայի և Երևանի միջև պայմանավորվածությունների վրա»,- ասաց Շաքարյանցը։

Միաժամանակ նա նշեց, որ քաղաքապետի հրաժարականը կապված է Ռուսաստանի առաջիկա ընտրությունների նախապատրաստման հետ։

Յուրի Լուժկովի հանդեպ վստահությունը կորցնելու կապակցությամբ ՌԴ նախագահ Դմիտրի Մեդվեդևը ստորագրել է նրան Մոսկվայի քաղաքապետի պաշտոնից ազատելու մասին հրամանագիրը: Լուժկովը քաղաքապետի պաշտոնն էր զբաղեցնում ավելի քան 18 տարի:-0-