Արցախի ժողովրդի ինքնորոշման իրավունքը սակարկության առարկա չէ. Հայաստանի նախագահ

Արցախի ժողովրդի ինքնորոշման իրավունքն առևտրի առարկա չէ, ասաց Հայաստանի նախագահ Սերժ Սարգսյանը։

«Ինչ վերաբերում է Լեռնային Ղարաբաղի խնդրին, ապա մենք աներկբա հնչեցրել ենք, որ Արցախի ժողովրդի ինքնորոշման իրավունքը մենք չենք պատրաստվում սակարկել որևէ մեկի հետ»,- նախօրեին հայտարարեց նախագահ Սարգսյանը Ռոստովի մարզում՝ ՌԴ Հարավային Դաշնային շրջանի հայ համայնքների ներկայացուցիչներին ուղղած իր խոսքում:

Նախագահը հիշեցրեց, որ Հայաստանը սառեցրել է հայ-թուրքական արձանագրությունների վավերացման գործընթացը: «Դրա հիմնական պատճառը շատ պարզ է. Թուրքիան այսօր պատրաստ չէ վավերացնել արձանագրությունները: Դրա տապալումն արդարացնելու նպատակով նա նորանոր նախապայմաններ է առաջ քաշում: Ավելին` նա փորձում է ներխուժել մի ոլորտ, ես նկատի ունեմ Արցախյան հարցի լուծման գործընթացը, որտեղ ակնհայտորեն անելիք չունի»,- ասաց Սարգսյանը։

«Ոչ հուսալի և անվստահելի գործընկերոջ հետ, որ պարբերաբար խախտում է նախնական պայմանավորվածությունները, մենք ներկա պահին խոսելիք չունենք»,- ասաց Սարգսյանը։

Նախագահը նշեց, որ իր համահայկական ուղևորության ընթացքում հենց Դոնի Ռոստովում հնչել են մտքեր, մտահոգություններ ու գաղափարներ: «Ժամանակը ցույց տվեց, որ Եվրոպայի վերջին փակ սահմանը բացելու համար մենք մեր կողմից արեցինք առավելագույնը, իսկ Թուրքիան պատրաստ չէ դրան»,- ասաց Սարգսյանը:--0--