ԵԽԽՎ նախագահը կայցելի Հայաստան

Եվրոպայի Խորհրդի Խորհրդարանական Վեհաժողովի նախագահ Մևլութ Չավուշօղլուն կայցելի Հայաստան մայիսի 12-13-ը, «Նովոստի-Արմենիա» գործակալությանը հայտնեցին Եվրոպայի Խորհրդի տեղեկատվական գրասենյակից։

Այցի ընթացքում նա կհանդիպի Հանրապետության նախագահ Սերժ Սարգսյանին, Ազգային ժողովի Նախագահ Հովիկ Աբրահամյանին, Արտաքին գործերի նախարար Էդվարդ Նալբանդյանին, Ազգային ժողովում ներկայացված քաղաքական տարբեր խմբակցությունների անդամների և արտախորհրդարանական ընդդիմությանը։

Չավուշօղլուն նաև կհանդիպի Դավիթ Հարությունյանին, ով նախագահում է Ազգային ժողովի Պետական-իրավական հարցերի մշտական հանձնաժողովում, որը պատասխանատու է 2008թ. մարտի մեկի և երկուսի դեպքերի քննության ԱԺ ժամանակավոր հանձնաժողովի առաջարկությունների կատարման մոնիթորինգի համար։

2008թ. փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ի բողոքի ցույցերը վերածվեցին անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվեց տասը և վիրավորվեց 265 քաղաքացի։

Հաղորդագրության համաձայն, հանդիպումներ են նաև նախատեսված Մարդու իրավունքների պաշտպանի, դիվանագիտական համայնքի և քաղաքացիական հասարակության ներկայացուցիչների հետ։ -0-