Հայկական եկեղեցին սիրո մասին լավագույն պատմության մրցույթ է հայտարարում

ԵՐԵՎԱՆ, 24  դեկտեմբերի. /Նովոստի-Արմենիա/. Արարատյան Հայրապետական թեմը երիտասարդների և սիրո արագահաս բարեխոս Ս. Սարգսի տոնին հայտարարում է սիրո իրական պատմությունների մրցույթ:

«2010 թ.-ին Սբ. Սարգսի տոնը կնշվի հունվարի 30-ին: հետևելով բարի ավանդույթներին՝ Արարատյան հայրապետական թեմը նախատեսում է մի շարք միջոցառումներ»,- ասվում է թեմի պաշտոնական կայքում տեղակայված հաղորդագրության մեջ:

Մրցույթն անցկացվում է երեք անվանակարգերում.  Ս. Սարգիս` մեր սիրո բարեխոս, 
Ս. Սարգիս` մեր ամուր ընտանիքի բարեխոս, Ս. Սարգիս` «Ամուր ընտանիք, ամուր Հայրենիք»:  

Յուրաքանչյուր անվանակարգում սահմանված են երեք դրամական մրցանակներ:
Պատմության տեքստը առավելագույնը 2 տպագիր էջի սահմաններում պետք է լինի` 12 տառաչափով: Դրանք մինչև հունվարի 15-ը պետք է ուղարկել [email protected] հասցեով:

Պատմությունները տպագիր տեսքով ընդունվում են նաև Արարատյան Հայրապետական թեմի առաջնորդարանում` Մամլո դիվանի գրասենյակում՝ 
Ռ. Իսրայելյան 21 հասցեով:

Լավագույն պատմությունները կտպագրվեն Արարատյան Հայրապետական թեմի «Շողակն Արարատյան» պաշտոնաթերթում:

Դրամական մրցանակից բացի հաղթողներին կտրվի նաև տոնը խորհրդանշող հուշանվեր: Մրցույթի արդյունքները կամփոփվեն տոնական համերգի ընթացքում:

Արարատյան Հայրապետական թեմը, Աշխարհի հայ նկարիչների միությունը և Հայաստանի Նկարիչների միությունը հրավիրում են նաև երիտասարդ ստեղծագործողներին (մասնագիտական կրթություն ունեցող մինչև 35 տարեկան անձանց)` մասնակցելու երիտասարդների և սիրո արագահաս բարեխոս Ս. Սարգսի տոնին նվիրված ցուցահանդես-մրցույթին:

Մրցույթի թեմաներն են՝ Սեր Աստծո հանդեպ, Սեր հայրենիքի հանդեպ, Սեր ծնողների հանդեպ, Փոխադարձ սեր:

Գրաֆիկայի, գեղանկարչության, քանդակի կամ դեկորատիվ արվեստի յուրաքանչյուր ճյուղում ներկայացված լավագույն  աշխատանքները կարժանան դրամական մրցանակների:

Աշխատանքներն ընդունվում են Նկարիչների միության տանը: Աշխատանքների հետ ներկայացնել տեսասկավառակ, որտեղ պետք է լինեն ստեղծագործողի 2 տարբեր որակյալ լուսանկարներ (ազատ ոճում), ներկայացվող աշխատանքների լուսանկարներ, ինքնակենսագրություն և կոնտակտային տվյալներ: Լավագույն աշխատանքները կտպագրվեն տոնական կատալոգում:

Սիրո և երիտասարդության հովանավոր Սբ. Սարգսի տոնը վերջին տարիներին բավականին լայն ճանաչում է ստացել: Արարատյան հայրապետական թեմն ամեն տարի Սրբի հիշատակության տոնի շրջանակներում տարբեր տոնական հանդեսներ, մրցույթներ, վիկտորինաներ, համերգներ է կազմակերպում:

Սբ. Արգսի տոնը շարժական է, քանի որ այն տոնելու օրը կախված է Սբ. Զատկի տոնից:

Հունվարի 30-ին Ս.Սարգիս Զորավարի անունը կրող եկեղեցիներում կմատուցվի Ս. Պատարագ, որից հետո կկատարվի երիտասարդների օրհնության կարգ: Կբաժանվեն տոնի մասին պատմող գունազարդ բացիկներ:--0