Ավելի քան 20 երկիր կմասնակցի «Մշակութային երկխոսություն» երիտասարդական երրորդ փառատոնին
21 երկրի երիտասարդներ կմասնակցեն «Մշակութային երկխոսություն» երրորդ ամենամյա միջազգային փառատոնին, որը 2008 թ.-ի օգոստոսի 20-27-ը կանցկացվի Ծաղկաձոր հանգստավայրում, հայտնեց ՀՀ սպորտի և երիտասարդության հարցերի փոխնախարար Արթուր Պողոսյանը։
«Փառատոնի նպատակը ժամանակակից երիտասարդությանը տարբեր երկրների մշակութային ավանդույթների ու ազգային ապրելակերպի հետ ծանոթացնելն է՝ նպաստելով կապերի հաստատմանը»,- երեքշաբթի լրագրողներին ասաց Պողոսյանը։
Նա ընդգծեց, որ փառատոնի մասնակիցների թիվն ամեն տարի ավելանում է, ինչը խոսում է այդ միջոցառման հանդեպ մեծ հետաքրքրության մասին։
Միջոցառմանը կարող են մասնակցել 18-ից 35 տարեկան երիտասարդներ Հայաստանից, Լեռնային Ղարաբաղից, Ջավախքից (Վրաստանի հայաբնակ տարածք), ինչպես նաև հայկական սփյուռքից։
Փառատոնի կազմակերպիչներն են «Համահայկական միջազգային երիտասարդական հիմնադրամը» և ՀՀ սպորտի և երիտասարդության հարցերի նախարարությունը։ Անցյալ տարի «Մշակութային երկխոսություն» փառատոնն անցկացվում էր «Բոլորը տարբեր են, բոլորը հավասար» («All different, all equal») եվրոպական շարժման շրջանակներում, ԱՊՀ գործադիր կոմիտեի ղեկավարությամբ --0--
