ԵՐԵՎԱՆ, 25 հոկտեմբերի./Նովոստի-Արմենիա/. Պետդումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինը մեկնաբանել է Հայաստան իր մուտքի արգելքը։
Երեքշաբթի ավելի վաղ վարչապետի ընտանիքին պատկանող «Հայկական ժամանակ» թերթը
հայտնել էր, որ Զատուլինի մուտքը Հայաստան արգելված է, և նա այժմ համարվում է անցանկալի անձ։
«Մեզ համար հանկարծակի էր, նամակ ստացանք ՀՀ ԱԺ արտաքին կապերի վարչության պետից: Մեզ ասացին, որ իմ այցն անցանկալի է, իսկ իմ հայտարարությունները վնասում են Հայաստանի Հանրապետությանը»,- ասել է պատգամավորը Yerevan.today-ի հետ զրույցում:
Զատուլինի Հայաստան մուտքի արգելքը «Հայկական ժամանակ»-ը բացատրում է նրանով, որ իր հրապարակային հարցազրույցներում պատգամավորը բազմիցս մեղադրել է ՀՀ իշխանություններին 44-օրյա պատերազմում պարտության մեջ։
«Ավելին՝ ներխուժելով Հայաստանի ներքաղաքական կյանք՝ Զատուլինը մեկ անգամ չէ, որ բարձրաձայնել է, թե Նիկոլ Փաշինյանը պետք է հեռանա։ Զատուլինը հասցրել էր անգամ ՀՀ իշխանություններին մեղադրել հայ-ռուսական հարաբերությունների մեջ սեպ խրելու համար։ Իսկ Հայաստան կատարած վերջին այցելության ժամանակ «Երկիր Մեդիա»-ին տված հարցազրույցի ընթացքում նա մեղադրել էր վարչապետին ՀՀ սուվերեն տարածքով «միջանցք» ստորագրելու համար։ «Հնարավոր միջանցքի շուրջ հարցերը պետք է տալ ստորագրողներին, «միջանցքը» ստորագրել է Փաշինյանը», - ասել է Զատուլինը», - գրում է ռեսուրսը:-0-