ԵՐԵՎԱՆ, 3 հունիսի. /Նովոստի-Արմենիա/. Հայաստանի առաջին նապագահ Լևոն Տեր-Պետրոսյանը ներկայացրել է իր դիրքորոշումը Ստեփանակերտում տեղի ունեցած միջադեպի վերաբերյալ:
ԶԼՄ-ների հաղորդմամբ, հունիսի 1-ին Արցախի ԱԱԾ մի խումբ աշխատողներ ծեծել են մի քանի քաղաքացիների, որոնց այնուհետև տեղափոխել են հիվանդանոցԼ Որոշ տվյալներով, միջադեպի պատճառը հատուկ ծառայության և քաղաքացիների միջև կենցաղային վեճն է: Ոստիկանները չեն միջամտել ծեծկռտուքին, իսկ դրանից հետո բերման են ենթարկել տուժած կողմի ներկայացուցիչներին: Շաբաթ օրը ծեծված քաղաքացիների հարազատները բողոքի ակցիա են անցկացրել Ստեփանակերտում:
Լևոն Տեր-Պետրոսյանի համոզմամբ, այն, ինչ տեղի ունեցավ Հայաստանում, մեղմ ասած, անթույլատրելի է Ղարաբաղում:
«Նկատի ունեմ բողոքի զանգվածային գործողությունները և ճնշումները ԼՂՀ իշխանությունների վրա: Պատերազմական վիճակում գտնվող պետության համար դրանք կարող են աղետալի հետևանքներ ունենալ: Փակագծերը չեմ ուզում բացել, հետևանքները, վստահաբար, պարզ են ցանկացած բանական մարդու համար»,- ասել է ՀՀ առաջին նախագահը:
Նրա խոսքով, այն, որ զանգվածային բողոքի առիթ հանդիսացած միջադեպի մեղավորները խստագույնս պետք է պատժվեն, ոչ ոք չի կարող առարկել. այս կապակցությամբ ԼՂՀ նախագահը ևս հստակ հավաստիացում է տվել:
«Սակայն ուժային կառույցների` ԱԱԾ և Ոստիկանության ղեկավարների հրաժարականի պահանջի կատարումը ծանր հարված կլինի ԼՂՀ իշխանական համակարգին, ինչից չեն հապաղի օգտվել մեր հակառակորդները: ԼՂՀ ԱԱԾ-ն և Ոստիկանությունը Բանակից հետո Ղարաբաղի անվտանգության ապահովման կարևորագույն հաստատություններն են, որոնց չի կարելի ցնցումների ենթարկել»,- ասել է Տեր-Պետրոսյանը:
Загружается новость ... "Лево"
Նրա կարծիքով, քանի որ պահանջները հասցեագրված են Բակո Սահակյանին, նրա խոսքը, որքան էլ հեղինակավոր, համոզիչ չի լինի բողոքավորների համար:
«Անհրաժեշտ է մի երրորդ, չեզոք կողմի ակտիվ միջամտությունն ու հորդորը` Ղարաբաղի ներքաղաքական կայունությունը վերականգնելու և պետական մեքենայի անխափան գործունեությունն ապահովելու համար: Այդ կողմը դեռևս 1993 թվականից իրեն պաշտոնապես Լեռնային Ղարաբաղի անվտանգության երաշխավոր հայտարարած երկրի` Հայաստանի Հանրապետության ղեկավարն է` Նիկոլ Փաշինյանը»,- ասել է նա:
Այդ գործում, Լևոն Տեր-Պետրոսյանի համոզմամբ, իրենց ազդեցությունը Ղարաբաղում պարտավոր են օգտագործել նաև Ռոբերտ Քոչարյանը, Սերժ Սարգսյանը, Արկադի Ղուկասյանը և Սամվել Բաբայանը, նույնիսկ վերջինիս անհապաղ ազատ արձակման միջոցով: Բոլոր հակասությունները մի կողմ դնելով` Բակո Սահակյանին մենակ չպետք է թողնել: -0-