Ադրբեջանական գրոհային ինքնաթիռները թռիչքներ են իրականացրել ԼՂՀ սահմանի մոտ, բայց օդային տարածություն չեն ներխուժել
Ադրբեջանական գրոհային ինքնաթիռներն ու մարտական ուղղաթիռները հինգշաբթի թռիչքներ են իրականացրել Լեռնային Ղարաբաղի Հանրապետության սահմանի մոտ, բայց երկրի օդային տարածություն չեն ներխուժել, «Նովոստի-Արմենիա» գործակալությանը հաղորդեցին ԼՂՀ պաշտպանության բանակի լրատվության և քարոզչության բաժնից։
«Այսօր ժամը 10:15-ից Ադրբեջանի ռազմաօդային ուժերի Քյուրդամիրում տեղակայված ավիացիոն գնդի 4 գրոհային ինքնաթիռներ և 9 մարտական ուղղաթիռներ Ադրբեջանի ԶՈՒ-ի 1-ին բանակային կորպուսում անցկացվող հրամանատարաշտաբային զորավարժությունների և ՀՕՊ ստորաբաժանումներում իրականացվող ստուգումների շրջանակում ուսումնամարտական թռիչքներ են իրականացրել շփման գծից 5-15կմ խորության վրա»,- ասվում է հաղորդագրության մեջ։
Ադրբեջանական օդուժի կողմից Արցախի օդային սահմանի խախտման դեպք չի արձանագրվել:
«ՊԲ հակաօդային ուժերի կողմից թռիչքային բոլոր թիրախները հավաստանշվել են ժամանակին և շարունակ պահվել են խիստ վերահսկողության տակ»,- ասվում է հաղորդագրության մեջ։ -0-
