Հակառակորդի կորուստները 10 անգամ ավելի են, քան ԼՂ պաշտպանության բանակինը. ՀՀ ՊՆ

ԵՐԵՎԱՆ, 6 ապրիլի./Նովոստի–Արմենիա/. Ղարաբաղա–ադրբեջանական շփման գծում Ադրբեջանի կորուստները10 անգամ ավելի են, քան ԼՂ պաշտպանության բանակինը, չորեքշաբթի կառավարության նիստի ժամանակ տեղեկացրեց ՀՀ պաշտպանության նախարար Սեյրան Օհանյանը։

«Արբեջանի գործողություններն աննախադեպ էին ղարաբաղյան պատերազմից հետո` կրակի խտության, օգտագործված տեխնիկայի, ներգրավված ուժերի, վարձկանների և ահաբեկիչների օգտագործման տեսակետից», – ասաց նախարարը։  

ԼՂՀ ՊՆ–ն հրապարակել է ոչնչացված ադրբեջանցի զինվորների լուսանկարները>>

Ապրիլի 1-ի լույս 2-ի գիշերը ղարաբաղա–ադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները։ Օպերատիվ տվյալներով`մարտական գործողությունների ընթացքում ոչնչացվել է 2 ուղղաթիռ, շուրջ 30 տանկ, «Գրադ» տիպի համազարկային կայանք, ծանր հրանետային համակարգ (ТОС), ինժեներական տեխնիկա,  6 անօդաչու սարք։  Ադրբեջանական զինուժը տվել է 300-ից ավելի մարդկային կորուստ:

Հայկական կողմը կորցրել է 14 տանկ, ունի 29 զոհ, 101–ը վիրավոր է, անհետ կորած է համարվում 26–ը։ Զոհվել են նաև քաղաքացիական անձինք, այդ թվում` մեկ երեխա և յոթ կամավոր։ Մարտական գործողությունները դադարեցվել են ապրիլի 5–ին մոտավորապես ժամը 12։00–ին, երբ ուժի մեջ մտան համապատասխան պայմանավորվածությունները։ -0–