ԵՐԵՎԱՆ, 27 ապրիլի. /Նովոստի-Արմենիա/. Bloomberg գործակալությանը տված հարցազրույցում ՀՀ նախագահի հայտարարությունները հանդարտեցրել են Լեռնային Ղարաբաղի հակամարտության արագացված բանակցությունների կողմնակիցների կրքերը, գրում է «Կոմերսանտը»:
Հրատարակության հաղորդմամբ, այն մասին, որ Երևանը և Բաքուն պատրաստ են վերսկսել երկխոսությունը, անցյալ շաբաթ ասել է Ադրբեջանի նախագահի օգնական Ալի Հասանովը. «Նախաձեռնության հեղինակը Վլադիմիր Պուտինն է: Նա դիմել է երկու երկրների նախագահներին, և այժմ պատրաստվում է բանակցային գործընթացը: Հնարավոր է` առաջիկա օրերին բանակցությունների ինտենսիվ փուլ սկսվի»:
Կրեմլի բարձրաստիճան աղբյուրը «Կոմերսանտին» հաստատել է. «Մենք գործարկել ենք բոլոր անհրաժեշտ դիվանագիտական մեխանիզմները` առաջիկայում բանակցությունների սեղանի շուրջ կողմերին նստեցնելու համար»:
Սակայն ՀՀ նախագահ Սերժ Սարգսյանը շտապել է հերքել Բաքվի և Մոսկվայի հայտարարությունները, նշում է «Կոմերսանտը»: Նա տարակուսանք է արտահայտել այն ազդանշանների վերաբերյալ, իբր առաջիկայում կարող են սկսվել խաղաղ բանակցությունները և թվարկել է մի քանի պատճառներ, որոնք, իր կարծիքով, երկխոսության վերսկսումը դարձնում են անժամանակ: Դրանցից մեկը վստահության միջոցների և անվտանգության երաշխիքների բացակայությունն է: «Մենք այնտեղ կսկսենք բանակցությունները, իսկ զինվորականներն այստեղ` պատերա՞զմը: Որտե՞ղ եք նման բան տեսել», - տարակուսանքով նշել է Սարգսյանը։
Հրատարակությունը նշում է, որ ՀՀ նախագահը հստակ ակնարկել է, որ իր երկրում հասարակությունը հիսթափված է Մոսկվայի գործողություններից, որը փորձում է հավասարակշռություն պահպանել Երևանի և Բաքվի միջև: Ավելին, նա ակնարկել է, որ այդ դժգոհությունը կարող է էլ ավելի ուժեղանալ: Վերջապես, խոսելով նախորդ շաբաթ ՌԴ ԱԳ նախարար Սերգեյ Լավրովի երևանյան այցի մասին` Սարգսյանը կարծիք է հայտնել, որ պարոն Լավրովը «այս պահի դրությամբ չէր կարող բերել որևէ առաջարկներ կամ փաստաթղթեր, քանի որ նա փորձառու դիվանագետ է և շատ լավ հասկանում է, որ անտրամաբանական է խոսել բանակցությունների մասին չորսօրյա պատերազմից հետո (հակամարտության ապրիլյան սրում, «Կոմերսանտ»)»: Սարգսյանը հնարավոր չի համարում նաև հակամարտության գոտում ռուս խաղաղապահների տեղակայումը, նշվում է հոդվածում։
Միաժամանակ Երևանի դեմարշը, որը նախընտրում է պահպանել Լեռնային Ղարաբաղի ներկա ստատուս-քվոն, դժվար իրավիճակի մեջ է դնում իր ռազմավարական դաշնակից Ռուսաստանին` մշուշոտ դարձնելով Մոսկվայի նախաձեռնած բանակցային գործընթացի հեռանկարները, գրում է հրատարակությունը:
«Մոսկվայի և Երևանի հարաբերություններում այս իրավիժակը դիտվում է այնպես, կարծես պոչը թափ է տալիս շանը: Սակայն պետք չէ մտածել, որ այսօր, ինչպես ԽՍՀՄ-ի ժամանակ, Մոսկվան «քաշում է թելիկներից»` լիովին վերահսկելով նախկին խորհրդային երկրների առաջատարներին: Այդ առաջատարներն ունեն իրենց պատկերացումները կարմիր գծերի մասին, որոնց սահմաններից նրանք չեն կարող անցնել», - պարզաբանել է Սերժ Սարգսյանի դրդապատճառները Կրեմլի աղբյուրը` ՌՊՀՀ դոցենտ, Միջազգային հարցերի ռուսական խորհրդի փորձագետ Սերգեյ Մարկեդոնովը:
Փորձագետի կարծիքով, Սերժ Սարգսյանի վերջին հայտարարությունները պայմանավորված են Հայաստանում ստեղծված իրավիճակով, որտեղ ապրիլի սկզբին կրած կորուստներից հետո հասարակությունը ավելի ծայրահեղական է տրամադրված և պատրաստ չէ գնալ զիջումների: «Նման իրավիճակում քաղաքական գործիչն ինքնսպանություն չի գործի` համաձայնվելով մասնակցել բանակցություններին: Խաղաղ գործընթացի վերսկսման համար հարկավոր է ուժեղ դրդապատճառ, որը դեռ չկա», - պարզաբանել է Սերգեյ Մարկեդոնովը: -0-