Հայտնի է տարվա ամենագեղեցիկ մարդը՝ ըստ People–ի (ՖՈՏՈ)
ԵՐԵՎԱՆ, 23 ապրիլի․/Նովոստի–Արմենիա/․ Հոլիվուդյան դերասանուհի Դեմի Մուրը ճանաչվել է տարվա ամենագեղեցիկ մարդը՝ ըստ ամերիկյան People ամսագրի, որը հրապարակել է Most Beautiful Person ամենամյա ցանկը։
Հրատարակության ներկայացուցիչները նաև հարցազրույց են վերցրել Դեմի Մուրից՝ նրա ուղղելով հարցերով գեղեցկության և դերասանական կարիերայի մասին։ Մուրը լրագրողներին ասել է, որ նրան հաջողվել է ձեռք բերել ազատության զգացում՝ ամբողջովին ընդունելով սեփական անձը։
«Եվ դա չի նշանակում, որ ես ընդունում եմ միայն այն մասերը, որոնք ինձ դուր են գալիս: Դա նշանակում է, որ ես ընդունում եմ իմ բոլոր մասերը», - բացատրել է դերասանուհին:
Դերասանուհին նշել է, որ իր արտաքինում նկատում է տարիքային բոլոր փոփոխությունները։ Մուրը նշել է, որ դա ազդում է իր ինքնագնահատականի վրա։
Դերասանուհին խոստովանել է, որ տարիների ընթացքում էապես փոխվել է իր վերաբերմունքն իր անձի նկատմամբ։ Այժմ նա գնահատում է սեփական մարմինը դիմացկունության և անցած ճանապարհի համար:
«Ես ավելի շատ եմ գնահատում այն ամենն, ինչի միջով անցել է իմ մարմինը, և որտեղ է այն ինձ բերել հիմա: Դա չի նշանակում, որ երբեմն չեմ նայում հայելու մեջ և չեմ մտածում. «Աստված իմ, ես ծեր տեսք ունեմ», կամ «Իմ դեմքը կախվել է», իհարկե, դա տեղի է ունենում: Բայց այսօր ես հասկանում եմ, որ դա իմ ճանապարհորդության մի մասն է», – նշում է հոլիվուդյան աստղը։
Ըստ Դեմիի՝ իսկական գեղեցկությունն աուտենտիկության մեջ է։
«Գեղեցկությունը պարզապես կա: Դուք կարող եք նայել ծաղկին և տեսնել նրա գեղեցկությունը: Նույնն է նաև մարդու դեպքում. ես դա տեսնում եմ աուտենտիկության և դրականության միջոցով: Գեղեցկությունը գալիս է ինքդ լինելու հարմարավետությունից», - ասաց նա:
Դերասանուհին հիշել է, թե ինչպես էր նախկինում ինքն իրեն «տանջում»՝ փորձելով հնարավորինս լավ տեսք ունենալ։ Նա նշել է, որ, օրինակ, կարող էր հեծանիվ քշել Մալիբուից մինչև Paramount ստուդիա՝ մոտ 26 մղոն (մոտ 42կմ), միայն հանուն արտաքին տեսքի։
«Ես ինձ տանջում էի: Խենթ բաներ, ինչպիսինն էր Մալիբուից մինչև Փարամաունթ հեծանիվ քշելը, որը մոտ 26 մղոն է», - խոստովանել է Մուրը:
«Շատ էի գնահատում արտաքին տեսքս: Բայց այսօր ամենամեծ տարբերությունը, որ տեսնում եմ այն է, որ իմ մոտեցումն այժմ հիմնված է առողջության, երկարակեցության և կյանքի որակի վրա: Ավելի նուրբ եմ դարձել ինքս ինձ հետ: Նախկինում ես շատ խիստ էի ինքս ինձ հետ, իմ մարմնի հետ հարաբերությունները գրեթե անտագոնիստական էին», – նշել է դերասանուհին։
Միևնույն ժամանակ, Մուրը խոստովանում է, որ կատարյալ չէ, բայց փորձում է հնարավորինս շատ առողջ սովորություններ պահպանել և ըմբռնումով է մոտենում այն փոփոխություններին, որ բերում է ժամանակը։
People ամսագիրը ամեն տարի հրապարակում է մոլորակի ամենագեղեցիկ մարդկանց անունները։ Տարբեր տարիներին այս պատվավոր կոչումը շնորհվել է կինոարդյունաբերության և շոու բիզնեսի հայտնի ներկայացուցիչներին՝ Ջուլիա Ռոբերթսին, Միշել Պֆայֆերին, Սոֆյա Վերգարային, Սինդի Քրոուֆորդին, Ջոդի Ֆոսթերին, Մեգ Ռայանին, Մել Գիբսոնին, Քորթնի Քոքսին, Թոմ Քրուզին, Լեոնարդո Դի Կապրիոյին, Նիկոլ Քիդմանին։
