Մեքսիկայում 97 ուղևոր տեղափոխող ինքնաթիռ է վթարվել

ԵՐԵՎԱՆ, 1 օգոստոսի./Նովոստի–Արմենիա/. Aeromexico ավիաընկերությանը պատկանող ուղևորատար ինքնաթիռ է վթարվել Դուրանգո քաղաքի օդանավակայանից օդ բարձրանալուց հետո։

Այս մասին հաղորդում է BBC–ին` հղում անելով Դուրանգոյի նահանգապետ Խոսե Ռոսաս Աիսպուրոյին։ 

Նշվում է, որ բոլոր ուղևորները ողջ են մնացել, նրանց մեծ մասն ինքնուրույն է դուրս եկել ինքնաթիռից։ 

Embraer 190 տիպի ինքնաթիռում եղել է 97 ուղևոր և անձնակազմի 4 անդամ։ Ինքնաթիռը կատարել է Դուրանգո–Մեխիկո չվերթը։ 

Տուժել են գրեթե բոլոր ուղևորները, սակայն նրանցից շատերը ստացել են թեթև վնասվածքներ և արդեն դուրս են գրվել հիվանդանոցից։ Հիմա հիվանդանոցում բուժում է ստանում 49 մարդ։ 

Նշվում է, որ ինքնաթիռը սկսել է ընկնել թռիչքուղուց օդ բարձրանալուց անմիջապես հետո։ Նախնական տվյալներով, ավիավթարի պատճառը վատ եղանակային պայմաններն են։

«Օդ բարձրանալիս ինքնաթիռը ենթարկվել է ուժգին քամու ազդեցությանը, ինչի հետևանքով այն ձախ թևով հարվածել է գետնին։ Հարվածի հետևանքով պոկվել են ինքնաթիռի երկու շարժիչները», –ասուլիսի ժամանակ նշել է Խոսե Ռոսաս Աիսպուրոն։ 

Ուղևորներին հաջողվել է մի քանի րոպեում դուրս գալ ինքնաթիռից։ Աղետի վայրում արված կադրերից պարզ է դառնում, որ հարվածից հետո ինքնաթիռում հրդեհ է բռնկվել։–0–