Ռուսաստանում դատվածություն ունեցող միգրանտներին կարգելեն ստանալ քաղաքացիություն և բնակության իրավունք
ԵՐԵՎԱՆ, 21 հուլիսի․/Նովոստի–Արմենիա/․ Ռուսաստանի Պետդուման ընդունել է օրենք, որը նախատեսում է Ռուսաստանի քաղաքացիության և երկրում բնակության իրավունքի տրամադրման մերժում այն օտարերկրացիների համար, ովքեր ունեն չհանված կամ չմարված դատվածություն:
Փաստաթղթի համաձայն՝ մերժման հիմք կդառնա ինչպես Ռուսաստանի տարածքում, այնպես էլ նրա սահմաններից դուրս կատարված ցանկացած հանցագործության համար դատվածությունը՝ անկախ դրա ծանրության աստիճանից:
Դատվածության հայտնաբերման դեպքում օտարերկրյա քաղաքացուն նախկինում տրված ժամանակավոր բնակության թույլտվությունը կամ կացության կարգավիճակը նույնպես կչեղարկվեն, գրում է gazeta.ru-ն:
Մինչ նոր նորմերի ուժի մեջ մտնելը կացության կարգավիճակի չեղարկումը թույլատրվում է, մասնավորապես, ծանր կամ առանձնապես ծանր հանցագործության համար դատվածության առկայության դեպքում:
Օրենքը նաև պարտավորեցնում է 14 տարեկանից բարձր օտարերկրացիներին ժամանակավոր բնակության թույլտվության կամ կացության կարգավիճակի ստացման դիմումներներ ներկայացնելիս ներկայացնել դատվածության առկայության կամ բացակայության մասին տեղեկանք:
Օրենքն ուժի մեջ կմտնի Դաշնության խորհրդի հավանությանը արժանանալուց, Ռուսաստանի նախագահի կողմից ստորագրվելուց և պաշտոնական հրապարակումից հետո:
