Ինչ է միկրովարկը. դրական և բացասական կողմեր

ԵՐԵՎԱՆ, 10 ապրիլի./Նովոստի–Արմենիա/. Ձեզ շատ շտապ գումար է հարկավոր, ընդ որում կարևոր է, որպեսզի գումարը լինի հենց հիմա, ի՞նչ անել։ Առաջինն ինչ մտածում ես` գումար վերցնել միկրովարկային կազմակերպությունից։ Լավ է, որ գումար ստանալու գործընթացը նման կազմակերպություններում երկար չի տևում և ավելի դյուրին է, քան բանկերում։ Հայաստանում միկրովարկերը, հատկապես վերջին տարիներին, լայն տարածում են գտել, բնակչությունն ակտիվորեն օգտվում է այդ կազմակերպությունների ծառայություններից։ Սակայն մի շտապեք որոշում ընդունել։ Վերջերս` մարտի 24–ին ԿԲ–ն ուժը կորցրած ճանաչեց Varks.am միկրովարկային կազմակերպության լիցենզիան ընդհանուր կապիտալի նվազագույն չափի պահանջը խախտելու համար: Այդ պատճառով եթե դուք, ամեն դեպքում, որոշել եք վերցնել միկրովարկ, փորձեք կատարել ավելի ուշադիր ընտրություն` ծանրութեթև անելով բոլոր դրական և բացասական կողմերը։ Այդ պատճառով «Նովոստի–Արմենիա» գործակալությունը կարևոր է համարում ներկայացնել միկրովարկերի բոլոր առանձնահատկությունները, խնդիրներն ու դրանցից խուսափելու ճանապարհները։ 

Ընդհանուր տեղեկատվություն միկրոֆինանսավորման մասին

 Հայաստանում միկրոֆինանսավորմամբ զբաղվում են ունիվերսալ վարկային կազմակերպությունները (ՈւՎԿ), որոնք ունեն ԿԲ–ի համապատասխան լիցենզիան։ Ի դեպ, ԿԲ–ն միակ կառույցն է, որը կարգավորում է ՈւՎԿ–ների գործունեությունը։ Հենց ԿԲ–ն է սահմանում տնտեսական նորմատիվներն ու պահանջները, ինչպես նաև վերահսկում է դրանց կատարումը։ 

Միկրոֆինանսավորման էությունն այն է, որ փոխառուն միկրոֆինանսական կազմակերպությունից պարտքով է վերցնում ոչ մեծ գումար և վերադարձնում այն տոկոսներով, օրինակ` 1–3 շաբաթ, 1 ամիս հետո և այլն։ Միաժամանաի վճարումներն իրականացվում են ժամկետի վերջում` տոկոսների հետ կակ ժամկետի ընթացքում` մինիմալ վճարումներով։ 

Միկրովարկերի մեջ հանադրվում են թե՛ վարկի, թե՛ փոխառության հատկանիշները։ Մասնավորապես, դրանք տրվում են միայն իրավաբանական անձանց և միայն փողի տեսքով՝ վարկատուի սահմանած տոկոսադրույքով։ Փոխառությունը ստանալու համար վարկառուն պետք է ներկայացնի միայն անձնագիր և պայմանագիր կնքի։ 

Ի՞նչն է ավելի շատ գրավում միկրովարկերում

Առաջին հերթին՝ արագությունն ու դրանց ձևակերպման հարմարությունը։ Պետք է միայն լրացնել հարցաթերթիկ և ներկայացնել անձնագիր։ Փոքր չափի միկրովարկերը ձևակերպվում են 15-20 րոպեում, իսկ գումարը կարելի է ստանալ առձեռն կամ քարտին։ 

Երկրորդ հերթին՝ ոչ խիստ պահանջներ. հաճախ փոքր գումարների համար չի պահանջվում եկամուտի հաստատում, վարկային պատմությանը նայում են «մատների արանքով»։ Ձեզնից չեն պահանջի գրավ կամ բարեկամների երաշխավորություն։ 

Ուշադրությո՛ւն՝ տոկոսնե՛ր

Հաշվի առեք, որ միկրովարկերի ամենամեծ թերությունը շատ բարձր տոկոսադրույքն է։ Եթե դուք մի քանի օրով եք վերցրել փողը, ապա տոկոսադրույքի հավելավճարը չնչին կլինի, բայց եթե ժամկետն ավելի երկար է, ապա ձեր պարտքը գնալով կաճի՝ դառնալով իսկական բեռ։

Եթե ժամանակին չվճարեք միկրովարկը, կսկսեն հաշվարկվել տուգանքներ յուրաքանչյուր չվճարված օրվա համար, չվճարված տոկոսադրույքների համար և այլն։ Բացի այդ, դուք ռիսկի տակ եք դնում ձեր՝ վստահելի վարկառուի համբավը, քանի որ ժամկետանց միկրովարկերի մասին տեղեկությունը (ինչպես սովորական վարկերինը) կհայտնվի Վարկային պատմությունների բյուրոյում։

Ե՞րբ արժե միկրովարկ վերցնել

Միկրովարկն արդարացված է, եթե դուք առանց գումարի եք մնացել և հստակ համոզված եք, որ շուտով փող կստանաք, կամ եթե շտապ գումար է անհրաժեշտ, իսկ աշխատավարձը մի քանի օրով ուշացրել են։ Իհարկե, եթե ձեր ընկերները կամ բարեկամները կարող են պարտքով փող տալ, ապա ավելի լավ է նրանց դիմել։ Եթե այս տարբերակները հարմար չեն, ապա մնում է միայն միկրովարկը (հիշում ենք ռիսկերի մասին)։

Ինչպե՞ս ընտրել միկրովարկը

Գլխավորը տոկոսադրույքն է և միկրովարկի ժամկետը: Մի դիմեք առաջին պատահած վարկային կազմակերպություն, ուսումնասիրեք տարբեր առաջարկներ և ընտրեք այն առաջարկները, որտեղ ամենացածր տոկոսադրույքներն են: Լրջորեն գնահատեք նաև ժամկետը: Մեկ ամիս ժամկետով միկրովարկը կարող է ծանր բեռ լինել ձեր բյուջեի համար: Գնահատեք սեփական ուժերը. վճարման ուշացման հետևանքով կարող են սահմանվել լուրջ տուգանքային պատժամիջոցներ:

Վարկատուին դիմելուց առաջ համոզվեք, որ վերջինս խաբեբա չէ: Միկրոֆինանսական կազմակերպությունների գործունեությունը վերահսկվում է Կենտրոնական բանկի կողմից, ստուգեք ձեր կողմից ընտրված ընկերությունն արդյոք ներառված է կարգավորիչի ռեեստրում: Պայմանագրի կնքումից առաջ ձեզ պարտավոր են տրամադրել լիարժեք տեղեկատվություն վարկի պայմանների, ձեր իրավունքների և պարտավորությունների մասին: Ստորագրելուց առաջ ուշադիր ուսումնասիրեք պայմանագիրը, այդ թվում` այն, ինչ գրված է մանրատառերով: Ծանոթացեք կազմակերպության իրական հաճախորդների արձագանքներին խաբեբաների զոհը չդառնալու համար: Եթե ինչ-որ բան ձեզ կասկածելի է թվում, փնտրեք այլ ՈՒՎԿ:

Իսկ ե՞րբ կտրականապես չի կարելի դիմել միկրովարկի համար

Երբ գումար է հարկավոր այլ պարտքերը վճարելու համար: Այդ դեպքում դուք խնդիրը չեք լուծի, այլ ավելի կխորացնեք այն:

Եթե չունեք եկամտի մշտական աղբյուր: Առանց եկամտի չեք կարող ժամանակին կատարել վճարուները և շատ արագ կհայտնվեք անելանելի դրության մեջ:

Եվ վերջում

Միկրովարկը գումար ստանալու արագ միջոց է՝ իր դրական և բացասական կողմերով: Ամեն դեպքում որոշողը Դուք եք:

Նյութը պատրաստվել է ԱՄԻ «Նովոստի–Արմենիա»–ի և ՀՀ կենտրոնական բանկի Սպառողների շահերի պաշտպանության և ֆինանսական կրթման կենտրոնի (www.abcfinance.am) «Ֆինանսական գրագիտություն» համատեղ նախագծի շրջանակում:-0-