ԵՐԵՎԱՆ, 10 ապրիլի./Նովոստի-Արմենիա/. Հնարավո՞ր է գումար վաստակել հոբբիի միջոցով: Հնարավոր է, եթե ունեք բավարար համբերություն, հավատ հաջողության նկատմամբ և որոշ ֆինանսներ: «Նովոստի-Արմենիա» գործակալությունն առաջարկում է մի քանի տարբերակ՝ վայելելու ձեր սիրելի զբաղմունքը և միաժամանակ գումար վաստակելու համար։
1. Վեբ դիզայն. այսօր բոլորին անհրաժեշտ է կայք՝ մեծ բրենդից մինչև փոքր բիզնես: Ինտերնետում կան կոնստրուկտորներ, որոնց միջոցով կարելի է ստեղծել նույնիսկ մեկ էջանոց կայք։ Դժվար չէ այդ ամենը սովորել, բայց ոչ բոլորն են պատրաստ դա անել։ Հետևաբար, շատ ընկերություններ պատվիրում և գնում են կայքեր կամ բրենդային էջեր: Եթե դուք տաղանդավոր վեբ դիզայներ եք կամ պարզապես կարողանում եք լավ օգտվել համակարգչից, օգտագործեք սեփական հմտություններն ու գումար վաստակեք:
2. Բլոգ վարեք ու գումար վաստակեք. սեփական բլոգը թույլ է տալիս ստեղծել ցանկացած ձևաչափի նյութեր և կիսվել սեփական զբաղմունքով այլ օգտատերերի հետ: Եվ կարևոր չէ, թե ինչով եք զբաղվում, եթե կարողանաք դա հետաքրքիր ներկայացնել, գրավել օգտատերերին, ապա ժամանակի ընթացքում ձեր բլոգը կունենա իր լսարանը, և այցելությունների թիվը կաճի: Ձեր հոդվածները ոչ միայն կկարդան, այլև կմեկնաբանեն: Եվ դուք կկարողանաք եկամուտ ստանալ գովազդի տեղադրումից, գործընկերային ծրագրերին մասնակցելուց կամ որևէ ապրանք և ծառայություն վաճառելուց:
3. Լուսանկարչություն. գեղեցիկ լուսանկարները միշտ մեծ լսարան են գրավում։ Կարող եք սկսել նկարահանել հարսանիքներ և այլ միջոցառումներ, վաճառել ձեր լուսանկարները տարբեր կայքերում, կատարել հին լուսանկարների ռետուշավորման և թվայնացման պատվերներ, ինչպես նաև կազմակերպել վարպետության դասեր՝ սովորեցնելով սկսնակ լուսանկարիչներին:
4. Տեսանյութերի խմբագրում. մեր օրերում տեսանյութերը հաղորդակցության ամենատարածված ձևերից են: Եթե դուք կարողանում եք օգտվել համակարգչից և տեսանյութեր խմբագրելու ծրագրերից, ժամանակն է այդ հոբբին վերածել աշխատանքի: Մոնտաժի հմտությունները պետք կգան տարբեր ստեղծագործական ոլորտներում, նույնիսկ բլոգերի և ինտերնետ խանութների համար կարճ տեսանյութեր ստեղծելու համար:
5. Բուսաբուծություն. կան մարդիկ, որոնք շատ են սիրում ծաղիկներ աճեցնել և նույնիսկ պատրաստ են գումար վճարել սենյակային և պարտեզի բույսերի հազվագյուտ ու գեղեցիկ տեսակների համար: Հաճախորդներ կարելի է գտնել՝ տեղադրելով հայտարարություններ գնման և վաճառքի տարբեր կայքերում, օրինակ` list.am-ում: Բացի այդ, ծաղկի սրահները հաճույքով ձեռք են բերում գունեղ և հազվագյուտ բույսեր:
6. Ակվարիում. ձկների բուծում և վաճառք. այս զբաղմունքը կարող է կայուն եկամուտ բերել։ Իմպրովիզացված ձկնաբուծարան կարելի է ստեղծել նույնիսկ ձեր տան փոքրիկ սենյակում: Իսկ պոտենցիալ հաճախորդներ կարող են դառնալ, օրինակ, կենդանիների վաճառքով զբաղվող խանութները:
7. Շոփինգ. եթե դուք լավ «գլուխ եք հանում» նորաձևությունից կամ կոսմետիկայից, կարող եք դառնալ խորհրդատու այս ոլորտում կամ կազմակերպել շոփինգ-տուրեր և համատեղ գնումներ։ Կարելի է նաև օգտվել ինտերնետից և վարել վիդեո բլոգ, որտեղ կխոսեք անձնական խնամքի նորույթների, հագուստի կամ դեկորատիվ կոսմետիկայի միտումների մասին:
8. Դարձեք դիմահարդար. եթե կարողանում եք դիմահարդարվել, ստեղծել կրեատիվ կերպարներ, և դա դուր է գալիս ձեր ընկերուհիներին ու ծանոթներին, և եթե հետևում եք հայտնի բրենդների կոսմետիկայի նորույթներին, ապա կարելի է մտածել կոսմետիկայի սեփական բիզնես բացելու մասին: Անպայման լուսանկարեք հաջողված աշխատանքները և տեղադրեք դրանք ձեր սոցիալական ցանցերում: Բաժանորդներին պատմեք ձեր ծառայությունների մասին, կիսվեք փորձով կոսմետոլոգիայի ոլորտում, փորձարկեք տարբեր ոճային կերպարներ:
9. Սարքավորումների վերանորոգում. հնարավոր է՝ դուք փոքր տարիքից սիրել եք քանդել և հավաքել ընդունիչներ, խոհանոցային կոմբայներ և այլ կենցաղային տեխնիկա: Մեծանալով՝ դուք չեք մոռացել ձեր կիրքը և նախկինի պես հաճույքով փորփրում ու վերանորոգում եք փչացած տեխնիկան: Առաջարկեք ձեր ծառայությունները հայտարարությունների կայքերի միջոցով և վերանորոգեք այլ մարդկանց իրերը գումարի դիմաց:
10. Զբոսավարի ծառայություններ ձեր քաղաքում. հոբբիի դրամայնացման այս ձևը հարմար է այն մարդկանց համար, ովքեր ուսումնասիրում են իրենց քաղաքի պատմությունը, սիրում են շփվել և կիսվել գիտելիքներով: Նման ծառայությունը բավականին պահանջված է հիմա, երբ Հայաստանում շատ այցելուներ կան։ Դուք կարող եք դառնալ զբոսավար և զբոսաշրջիկների համար էքսկուրսիաներ կազմակերպել ձեր քաղաքում: Դուք կարող եք առաջարկել ձեր ծառայությունները սոցցանցերով:
11. Բնակելի տարածքների վերանորոգում. միշտ պահանջվում են վարպետներ տարածքների վերանորոգման և հարդարման աշխատանքների համար: Հմուտ տղամարդկանց համար երբեք դժվար չի լինի կատարել նման աշխատանք: Պատվերները կարելի է գտնել՝ համապատասխան կայքերում հայտարարություններ տեղադրելով կամ պարզապես փակցնելով գովազդային թերթիկներ շենքերի մուտքերի մոտ։ Հավաքեք հաճախորդների կարծիքները, լուսանկարեք և տեսանկարահանեք ինտերիերի ձևավորումը, և դուք միշտ կունենաք պատվերներ:
12. Միջոցառումների կազմակերպման ծառայություններ. դուք զգու՞մ եք, որ կարողանում եք կազմակերպել ցանկացած մասշտաբի տոնական միջոցառումներ, սա կարող է դառնալ լրացուցիչ կամ հիմնական եկամտի աղբյուր: Բոլորը սիրում են տոնել, բայց միայն քչերը կարող են պլանավորել միջոցառումը, պահպանել կարգուկանոն և արժանանալ ներկաների հիացական գնահատականներին: Կարելի է սկսել փոքրիկ խնջույքներ, երեխաների ծննդյան տոներ կազմակերպելուց։ Առաջին հաճախորդները կլինեն ձեր ընկերներն ու ծանոթները։ Անպայման լուսանկարեք ու տեսագրեք միջոցառումները, նյութերը տեղադրեք սոցիալական ցանցերում։ Ժամանակի ընթացքում, երբ կկատարեք ավելի մեծ պատվերներ և կունենաք մեծ թվով հաճախորդներ, կկարողանաք սահմանել ձեր սեփական հոնորարը կատարած աշխատանքի համար:
13. Ավտոթյունինգ. դուք «գլուխ եք հանում» մեքենաներից և գիտեք, թե ինչպես կարելի է հին մեքենան վերածել երազանքի: Ցանկանու՞մ եք աշխատել սեփական ավտոտնակում և գումար վաստակե՞լ ձեր հոբբիից: Առաջարկեք ձեր ընկերներին իրենց մեքենաների թյունինգի ծառայություններ:
Նույնիսկ թափքի փոքր փոփոխությունների շնորհիվ կարելի է շատ ավելի գրավիչ դարձնել մեքենայի արտաքին տեսքը։ Լուսանկարեք ձեր աշխատանքները, տեսագրեք, կիսվեք տեղեկատվությամբ ձեր բլոգում և սոցցանցերում: Հմտությունների աճին զուգահեռ դուք կկարողանաք ձեռք բերել գործիքներ և պրոֆեսիոնալ սարքավորումներ, ավելի հեռանկարային նախագծեր մշակել: Մեկնարկային կապիտալի դեպքում դուք կարող եք մասնագիտանալ, ձեռք բերել հին մեքենաներ, վերանորոգել դրանք և վաճառել ավելի բարձր գնով:
Կարևոր է իմանալ
Սկզբնական շրջանում սիրելի գործով զբաղվելը չի ենթադրում հարկերի վճարում, եթե դուք այդ գործունեությունից չեք ստանում կայուն եկամուտ: Բայց հենց սկսեք լիարժեք գումար վաստակել, պետք է գրանցվեք որպես անհատ ձեռներեց կամ ինքնազբաղված՝ կարգավորիչների հետ խնդիրներից խուսափելու համար: Նաև հարկավոր է ճշտել՝ արդյոք ձեր գործունեությունը նախատեսում է լիցենզավորում, թե ոչ:
Նյութը պատրաստվել է ԱՄԻ «Նովոստի–Արմենիա»– ի և ՀՀ կենտրոնական բանկի Սպառողների շահերի պաշտպանության և ֆինանսական կրթման կենտրոնի (www.abcfinance.am) «Ֆինանսական գրագիտություն» համատեղ նախագծի շրջանակում։-0-
