ԵՐԵՎԱՆ, 8 հունիսի./Նովոստի–Արմենիա/. Ինչպես օրերս հայտնի դարձավ, Հայաստանի արժեթղթերրի շուկայում գործում է կեղծ լիցենզիայով ընկերություն։ Չարագործները սոցցանցերում տարածում են կեղծ գովազդային տեսանյութ` առաջարկելով ներդրումային ծառայություններ։ Այդ տեսանյութը գրավել է կարգավորիչի ուշադրությունը։
ՀՀ Կենտրոնական բանկը և «Գազպրոմ Արմենիա» ՓԲԸ–ն (որի անունից էլ գործում են չարագործները, խմբգր.) հանդես են եկել հայտարարություններով` զգուշացնելով կեղծ գործողությունների մասին։
ՀՀ կենտրոնական բանկը, մասնավորապես, տեղեկացնում է, որ արժեթղթերի շուկայում մասնագիտացված մասնակցի կեղծված լիցենզիայի հիման վրա «Գազպրոմ Արմենիա» ՓԲԸ անունից հանդես եկող որոշ անձինք հրապարակային առաջարկի միջոցով փորձում են ՀՀ-ում հաճախորդներ ներգրավել՝ առաջարկելով ներդրումային ծառայություններ:
«Հաշվի առնելով, որ նշված անձինք չլիցենզավորված գործունեություն են իրականացնում և չեն գտնվում Կենտրոնական բանկի վերահսկողության տիրույթում՝ հորդորում ենք զգոն լինել, չվստահել և չարձագանքել նման առաջարկների՝ զերծ մնալով նշված առաջարկի ներքո ցանկացած գործարար հարաբերություն հաստատելուց», – նշում են Կենտրոնական բանկից:
ՀՀ տարածքում ներդրումային ծառայություններից օգտվելու համար կարելի է դիմել Կենտրոնական բանկի կողմից համապատասխան լիցենզիա ստացած ներդրումային ծառայություններ մատուցող կազմակերպություններին, որոնց ցանկին կարելի է ծանոթանալ
հետևյալ հղմամբ։
«Գազպրոմ Արմենիա» ՓԲԸ-ն իր հերթին զգուշացնում է, որ սոցիալական ցանցերում տարածվող
տեսահոլովակները ընկերության հետ որևէ առնչություն չունեն։
««Գազպրոմ Արմենիա» ՓԲԸ-ն պաշտոնապես տեղեկացնում է, որ վերջին շրջանում սոցիալական ցանցերի միջոցով տարածվող՝ ընկերության «բաժնետոմսերի ձեռքբերման, նախագծերում ներդրումներ կատարելու միջոցով շահույթ ստանալու» մասին տեսահոլովակները «Գազպրոմ Արմենիա» ՓԲԸ-ի հետ որևէ առնչություն չունեն։ Ընդ որում՝ նման կեղծ տեսահոլովակների հեղինակները ապօրինաբար օգտագործում են ընկերության պաշտոնական ապրանքանիշը՝ թյուրիմացության մեջ գցելով սոցիալական ցանցերի օգտատերերին». – նշվում է «Գազպրոմ Արմենիա» ընկերության հայտարարության մեջ։
Ընկերությունը նաև պաշտոնապես ընդգծում է, որ նմանատիպ տեսահոլովակները խարդախության դրսևորում է։
«Հարկ ենք համարում նաև տեղեկացնել, որ «Գազպրոմ Արմենիա» ՓԲԸ-ի գործունեությանն առնչվող տեղակատվությունը հրապարակվում է բացառապես ընկերության պաշտոնական կայքում և Facebook սոցիալական ցանցի պաշտոնական էջում», – նշում են ընկերությունից։
Նյութը պատրաստվել է ԱՄԻ «Նովոստի–Արմենիա»– ի և ՀՀ կենտրոնական բանկի Սպառողների շահերի պաշտպանության և ֆինանսական կրթման կենտրոնի (www.abcfinance.am) «Ֆինանսական գրագիտություն» համատեղ նախագծի շրջանակում։-0-
