ԵՐԵՎԱՆ, 21 մայիսի. /Նովոստի–Արմենիա/. Երևանի Հ.Թումանյանի անվան տիկնիկային թատրոնում նախօրեին կայացել է Ընթերցանության առաջին համահայկական մանկապատանեկան առցանց փառատոն–մրցույթի հաղթողների պարգևատրման արարողությունը։
Ինչպես նշեց արարողության ընթացքում նշեց Թումանյանի տուն–թանգարանի տնօրեն Անի Եղիազարյանը, փառատոնը հնարավորություն ընձեռեց ընթերցանության միջոցով միավորել աշխարհասփյուռ հայ երեխաներին։
«Փառատոնը մասշտաբային հարթակ դարձավ մեկ, թումանյանական լեզվով շփման համար։ Այն դարձավ մի տոն, որտեղ չկան պարտվածներ»,– ասաց նա։
Մրցույթի համակազմակերպիչ, «Բեմել» պրոդյուսերական ընկերության տնօրեն Տիգրան Գյուլումյանն իր հերթին կարևորեց մրցույթի մասնակիցների լայն աշխարհագրությունը։
«Մրցույթն իսկապես ապացուցեց իր համահայկական նշանակությունը, ինչի կարևոր ցուցանիշը տարբեր մայրցամաքների երեխաների մասնակցությունն էր»,– ասաց նա։
Մրցույթի ֆինալիստները ներկայացրին Թումանյանի տարբեր ստեղծագործություններ` նրանցից յուրաքանչյուրը յուրովի և վարպետորեն ընթերցեց հայ մեծ բանաստեղծի պոեմների հատվածներ։
Մրցույթի արդյունքներն ամփոփվեցին երկու անվանակարգերով` առցանց քվեարկության արդյունքներ և ժյուրիի մրցանակ։
6-8 տարեկանների խմբում հաղթող դարձավ վեցամյա Անահիտ Չախուրյանը Երևանից, 9-12 տարեկանների խմբում` 11–ամյա Դավիթ Թարոյանն Օմսկից (Ռուսաստան), իսկ 13-16 տարեկանների խմբում` 13–ամյա Ամալիա Եղայանը Երևանից։
6-8 տարեկանների խմբում ժյուրիի գլխավոր մրցանակը շնորհվեց յոթամյա Զավեն Յուզբաշյանին Երևանից, 9-12 տարեկանների խմբում` Էլեն Մուշաղյանին Հրազդանից, 13-16 տարեկանների խմբում`13–ամյա Եվա Հակոբյանին Կապանից։
Հատուկ մրցանակներ շնորհվեցին փառատոնի գործընկերներից` Թումանյանի տուն–թանգարանից, «Գուգարք» մանկական ճամբարից և «Վեգա» ընկերությունից։
Մրցույթը նախատեսված էր 6–ից 16 տարեկան երեխաների համար ամենայն հայոց բանաստեղծ Հովհաննես Թումանյանի ստեղծագործությունների մասսայականացման և ներդաշնակ մշակութային զարգացման խրախուսման նպատակով։
Մրցույթին մասնակցելու համար անհրաժեշտ էր փառատոնի կազմակերպիչ «Բեմել» պրոդյուսերական կենտրոնին ուղարկել երկուրոպեանոց տեսագրություն Թումանյանի ստեղծագործություններով։ Ֆինալիստները որոշվել են առցանց քվեարկության միջոցով։ -0-
