Ջիվան Գասպարյանը հանդես կգա աշնանը Երևանում իր թոռան և «Մոսկվայի Վիրտուոզների» հետ
ԵՐԵՎԱՆ, 6 ապրիլի. /Նովոստի-Արմենիա/. Հայկական դուդուկի աշխարհահռչակ վարպետ Ջիվան Գասպարյանը, նրա թոռան՝ Ջիվան Գասպարյան կրտսերի և Վլադիմիր Սպիվակովի գլխավորած «Մոսկվայի Վիրտուոզների» համատեղ համերգն է ծրագրվում անցկացնել աշնանը Երևանում, չորեքշաբթի լրագրողներին ասաց ինքը Ջիվան Գասպարյանը։
«Մարտի 26-ին համերգ է անցկացվել Մոսկվայում, իսկ երևանյան համերգի ամսաթիվը դեռ որոշված չէ... Կարող եմ ասել, որ համերգը կանցկացվի աշնանը։ Ինքը Սպիվակովը նույնպես պետք է ազատ լինի։ Դյուրին չէ Մոսկվայից 40-50 մարդ բերել»,- ասաց Գասպարյանը։
Մաեստրոն լրագրողների հետ կիսեց նաև «Մոսկվայի Վիրտուոզներ» նվագախմբի համերգից ստացած տպավորությունները։
Առաջին հերթին Գասպարյանն ընդգծեց համերգի բարձր մակարդակը և ինքնատիպ գործիքավորումը։
Նա նշեց, որ երկացանկում ընդգրկվեցին ոչ միայն հայ դասական կոմպոզիտորների (Կոմիտաս, Եկմալյան) ստեղծագործություններ և հայկական ժողովրդական մեղեդիներ, այլ նաև եվրոպական դասական երաժշտություն։
Նա նշեց, որ համերգին հիմնականում ներկա են եղել ռուսներ և մի շարք այլ երկրների ներկայացուցիչներ։
Վարպետը հայտնեց, որ նվագախմբի հետ ելույթ ունենալու հրավեր է ստացել Վլադիմիր Սպիվակովից Հայաստան կատարած իր այցերից մեկի ժամանակ։
Պատմելով համերգին իր թոռան մասնակցության մասին՝ նա ընդգծեց, որ Ջիվան Գասպարյան կրտսերը ոչ միայն նրա թոռն է, այլ նաև տաղանդավոր աշակերտ ու երաժիշտ, ով հայտնի է աշխարհի բազամթիվ երկրներում, և հենց դրանով է պայմանավորված Գասպարյան կրտսերի մասնակցությունը համերգներին իր պապի հետ։
«Եթե նա տաղանդավոր չլիներ, ես նրան թույլ չէի տա դուդուկը ձեռքը վերցնել»,- ասում է Գասպարյանը թոռան մասին։
Նա ավելացրեց, որ իր առաջիկա ծրագրերի թվում է Ռուսաստանի Նախագահական նվագախմի հետ համերգը, որը կկայանա ապրիլի 29-ին՝ Կրեմլի պալատում։ -0-
