Ուիթքոֆ․ ԱՄՆ–ն Հայաստանի և Ադրբեջանի պայմանավորվածությունները տեղափոխում է գործնական հարթություն

ԵՐԵՎԱՆ, 11 օգոստոսի․/Նովոստի–Արմենիա/․ ԱՄՆ-ն վերջին տարվա ընթացքում աշխատել է Հայաստանի և Ադրբեջանի հետ խաղաղության համաձայնագրերի գործնական իրականացման ուղղությամբ, որոնց առանցքային տարրերից մեկը դարձավ «Թրամփի ուղի՝ հանուն միջազգային խաղաղության և բարգավաճման» (TRIPP) հայեցակարգը, հայտարարել է ԱՄՆ նախագահի խաղաղարար առաքելությունների հարցերով հատուկ պատվիրակ Սթիվ Ուիթքոֆը:

Washington Examiner պարբերականի կայքում հրապարակված հեղինակային սյունակում, որը նվիրված է 2025 թվականի օգոստոսի 8-ին Վաշինգտոնում հայ-ադրբեջանական համաձայնությունների մեկամյակին, Ուիթքոֆը նշել է, որ ամերիկյան միջնորդության մեկնարկից հետո ԱՄՆ ներկայացուցիչները հաջորդ հինգ ամիսների ընթացքում ինտենսիվ հանդիպումներ են անցկացրել Բաքվում և Երևանում:

Նրա խոսքով՝ այս մաքոքային դիվանագիտությունը ցույց տվեց, որ բազմամյա հակամարտության կարգավորման համար անհրաժեշտ է այլ մոտեցում: Նա նշել է, որ բանակցային գործընթացի արդյունքը դարձավ «Թրամփի ուղի՝ հանուն միջազգային խաղաղության և բարգավաճման» (TRIPP) հայեցակարգը, որը նախատեսում է ԱՄՆ-ի գործընկերությունը Հայաստանի հետ՝ հանրապետության տարածքով անխափան մուլտիմոդալ երթուղիների ստեղծման համար՝ դրա տարածքային ամբողջականության և ինքնիշխանության լիակատար պահպանմամբ:

Ուիթքոֆը նաև հայտնել է, որ վերջին տարվա ընթացքում ԱՄՆ-ն Հայաստանի և Ադրբեջանի հետ աշխատել է համաձայնությունների գործնական իրականացման ուղղությամբ, այդ թվում՝ երկաթուղային ենթակառուցվածքի համար ինժեներական հետազոտությունների, պետական-մասնավոր համակարգման և կապիտալի ներգրավման մեխանիզմների միջոցով:

Ուիթքոֆի գնահատմամբ՝ այսօր Հարավային Կովկասը դարձել է ավելի անվտանգ, կայուն և ավելի բարգավաճող:

TRIPP նախագծի մասին

«Թրամփի ուղի՝ հանուն միջազգային խաղաղության և բարգավաճման» (TRIPP) նախագիծը նախատեսում է Հայաստանի տարածքում անխափան մուլտիմոդալ տարանցիկ ենթակառուցվածքի ստեղծում՝ իր տարածքում նախագծի ենթակառուցվածքի նկատմամբ հանրապետության լիակատար ինքնիշխանության պահպանմամբ: Մասնավորապես, նախագիծը պետք է ապահովի տրանսպորտային հաղորդակցություն Ադրբեջանի հիմնական մասի և Նախիջևանի Ինքնավար Հանրապետության միջև, ինչպես նաև ընդլայնի տարածաշրջանային երթուղիները, որոնք Կենտրոնական Ասիան և Կասպից տարածաշրջանը կապում են Եվրոպայի հետ:

Հայաստանը և ԱՄՆ-ն 2026 թվականի հունիսին ստորագրել են TRIPP-ի վերաբերյալ ռազմավարական համագործակցության շրջանակային համաձայնագիր. նախագծի իրականացման համար ստեղծվել է հայ-ամերիկյան համատեղ TRIPP Development Company ընկերությունը:

TRIPP-ը դիտարկվում է որպես ավելի լայն Անդրկասպյան առևտրային երթուղու մաս: Այս երթուղու երկայնքով մասնավոր ներդրումները խթանելու համար ԱՄՆ-ն գործարկել է Trans-Caspian Enterprise Fund-ը, որը կապիտալիզացվել է 201 մլն դոլարով՝ ամերիկյան կառավարության միջոցների հաշվին:

Հայաստանի վարչապետ Նիկոլ Փաշինյանը հայտարարել է, որ TRIPP-ը նախ և առաջ ներդրումային նախագիծ է, որի շնորհիվ ակնկալվում է նոր ներդրումների միլիարդավոր դոլարների հոսք դեպի Հայաստան: