Ժիրինովսկին գրանցվել է որպես ՌԴ նախագահի թեկնածու

Ռուսաստանի կենտրոնական ընտրական հանձնաժողովը չորեքշաբթի կայացած նիստի ընթացքում ՌԼԴԿ առաջնորդ Վլադիմիր Ժիրինովսկուն գրանցել է ՌԴ նախագահի պաշտոնի թեկնածու, հաղորդում է «ՌԻԱ Նովոստիի» թղթակիցը:

Ռուսաստանի նախագահական ընտրությունները կանցկացվեն 2012թ.-ի մարտի 4-ին:

Ավելի վաղ ԿԸՀ-ն որպես թեկնածուներ գրանցել էր իշխող «Եդինայա Ռոսիայից» վարչապետ Վլադիմիր Պուտինին, ինչպես նաև «Սպրավեդլիվայա Ռոսիայից» Սերգեյ Միրոնովին: Ակնկալվում է, որ չորեքշաբթի նաև կգրանցվի ՌԴԿԿ առաջնորդ Գենադի Զյուգանովը:

Մարտյան ընտրություններին մասնակցելու համար ԿԸՀ-ում առաջադրման և փաստաթղթերի տրման ընթացակարգ է անցել նաև «Յաբլոկոյի» հիմնադիրներից մեկը՝ Գրիգորի Յավլինսկին:

Բացի կուսակցական թեկնածուներից, նախագահական ընտրություններին նախատեսում են մասնակցել նաև ինքնառաջադրվածները: ԿԸՀ-ն ընտրողների հինգ խումբ է գրանցել, որոնք ստեղծվել են թեկնածուների առաջադրումներն աջակցելու համար՝ գործարար Միխայիլ Պրոխորովին, Վլադիվոստոկի նախկին քաղաքապետ Վիկտոր Չերեպկովին, Իրկուտսկի քաղաքապետ Դմիտրի Մեզենցևին, Օրենբուրգի հասարակական գործիչ Ռինատա Խամիևին և «Վոլյա» չգրանցված կուսակցության առաջնորդ Սվետլանա Պեունովային: Ինքնառաջադրվածներին, ինչպես նաև չգրանցված կուսակցությունների թեկնածուներին, գրանցման համար անհրաժեշտ է իրենց օգտին ընտրողների երկու միլիոնից ոչ պակաս ստորագրություն հավաքել:

Հունվարի 18-ին ԿԸՀ-ն ավարտին կհասցնի ՌԴ նախագահի պաշտոնի թեկնածությունների գրանցման համար փաստաթղթերի ընդունումը: -0-