Անհայտ անձինք Մոսկվայում հարձակում են գործել «Մոսկվայի վիրտուոզներ» նվագախմբի մենակատար Դենիս Շուլգինի վրա, երեքշաբթի «ՌԻԱ Նովոստիին» հայտնել է մայրաքաղաքի իրավապահ մարմինների աղբյուրը։
Դա երկրորդ արտակարգ պատահարն է նվագախմի երաժիշտների նկատմամբ վերջին օրերին. կիրակի «Մոսկվայի վիրտուոզների» առաջին ջութակ Գեորգի Ցայը ստացել է ծակող-կտրող առարկայով հասված վերք որովայնի շրջանում և ձեռքերի բազմաթիվ վնասվածքներ։
«Նախօրեին ժամը 22։31-ին «02» ծառայություն է դիմել 1974թ. ծնված, «Մոսկվայի վիրտուոզներ» նվագախմբի մենակատար Շուլգինը և հայտարարել, որ ժամը 22։25-ին Կուտուզովի պողոտայի 72 տան մոտ իրեն են հանդիպել մի քանի անծանոթներ, հարվածներ հասցրել, վերցրել են նվագախմբին պատկանող ջութակը և անհետացել»,- պատմել է գործակալության զրուցակիցը։
Նրա խոսքերով, Շուլգինը հոսպիտալացվել է գանգի հիմնային ոսկրերի կոտրվածքներով և ուղեղի ցնցումով։
Նյութական վնասի չափը պարզվում է։ ՆԳՔՎ ներկայացուցիչը նշել է, որ երկու դեպքում էլ հանցագործները բռնագրավել են երաժիշտների ունեցվածքը։ Գեորգի Ցայի վրա կիրակի օրը կատարած հարձակման ժամանակ անծանոթները բռնագրավել են անձնական իրերով պայուսակը, իսկ Դենիս Շուլգինի վրա հարձակման ժամանակ Կուտուզովի պողոտայում կողոպտիչները բռնագրավել են թանկարժեք երաժշտական գործիքը։
«Օպերատիվ աշխատողները դիտարկում են հարձակման երկու վարկած։ Դա թանկարժեք երաժշտական գործիքին տիրանալու փորձ է, երաժիշտների միջև առկա ներքին կոնֆլիկտ։
Չի բացառվում նաև, որ մրցակցությունից դրդված՝ ինչ-որ մեկն անում է ամեն ինչ, որպեսզի «Մոսկվայի վիրտուոզներ» նվագախումբը չկարողանա աշխատել»,- ասաց ՆԳՔՎ ներկայացուցիչը։
Հարձակումների փաստով հարուցվել են քրեական գործեր «մարմնական վնասվածքներ հասցնելը» և «կողոպուտ» հոդվածներով, կատարվում են անհրաժեշտ քննչական գործողություններ տվյալ հանցագործությունները բացահայտելու համար։ -0-
