Ռոբերտ Քոչարյանը հայտարարել է Ռուսաստանի հետ Հայաստանի հարաբերությունների վատթարացման ռիսկերի մասին
ԵՐԵՎԱՆ, 25 մայիսի․/Նովոստի-Արմենիա/․ «Հայաստան» դաշինքի առաջնորդ, ՀՀ երկրորդ նախագահ Ռոբերտ Քոչարյանը Վայքում կայացած նախընտրական հանդիպման ժամանակ անդրադարձել է Ռուսաստանի հետ Հայաստանի հարաբերությունների թեմային և դրանց նշանակությանը երկրի տնտեսության ու անվտանգության հարցում։
«Ռուսաստանը անվտանգության ոլորտում ոչ միայն հավասարակշռող ուժ է, այլև մեր հիմնական տնտեսական գործընկերն է։ Հայաստանի բնակչության զգալի մասի բարեկեցությունը կախված է Ռուսաստանի հետ տնտեսական հարաբերություններից։ Սա փաստ է, որից հնարավոր չէ խուսափել»,- նշել է Քոչարյանը։
Նրա կարծիքով՝ Հայաստանի իշխանությունները հետևողականորեն վատթարացնում են հարաբերությունները Ռուսաստանի հետ՝ «փորձանք բերելով սեփական ժողովրդի գլխին»։
Հայաստանից ՌԴ արտադրանքի մատակարարումների սահմանափակումների մասին
Ավելի վաղ «Ռոսպոտրեբնադզորը» կասեցրել էր Հայաստանից «Ջերմուկ» հանքային ջրի բոլոր խմբաքանակների, ինչպես նաև հայաստանյան երեք արտադրողների գինու և կոնյակի ներմուծումն ու շրջանառությունը Ռուսաստանում։
Բացի այդ, «Ռոսսելխոզնադզորը» ժամանակավոր սահմանափակումներ է մտցրել Հայաստանից ծաղկային և պարենային արտադրանքի ներմուծման նկատմամբ՝ մինչև ՀՀ սննդամթերքի անվտանգության տեսչական մարմնի հրավերով ռուս մասնագետների մասնակցությամբ տեսչական ստուգումների ավարտը։ Կարգավորողն ավելի վաղ հայտարարել էր նաև Հայաստանից ՌԴ մատակարարվող բանջարեղենի և մրգերի վերաբերյալ դժգոհությունների մասին։
