Գագիկ Ծառուկյանը հայտարարել է Ռուսաստանի հետ «տնտեսական պատերազմի ծանր հետևանքների ռիսկի» մասին

ԵՐԵՎԱՆ, 25 մայիսի․/Նովոստի-Արմենիա/․ «Բարգավաճ Հայաստան» կուսակցության առաջնորդ, նախկին պատգամավոր, «Մուլտի Գրուպի» նախագահ Գագիկ Ծառուկյանը հայտարարել է Հայաստանի համար ծանր հետևանքների ռիսկի մասին՝ Ռուսաստանի հետ տնտեսական հարաբերությունների վատթարացման դեպքում։

«Երբ ես ասում եմ, որ Ռուսաստանի քաղաքական ուժերի և բոլոր ազդեցիկ շրջանակների հետ պետք է ունենալ նորմալ, հարգալից աշխատանքային հարաբերություններ, որ լուծենք մեր երկրի հարցերն ու խուսափենք անիմաստ, վնասակար թշնամանքից, ինձ պիտակավորում են որպես ռուսամետի»,- Facebook-ի իր էջում գրել է Ծառուկյանը։

Նրա խոսքով, այսօր ամբողջ աշխարհը` սկսած ԱՄՆ-ից, ուզում է կարգավորել հարաբերությունները Ռուսաստանի հետ` իրենց անվտանգության և սեփական ժողովուրդների բարեկեցության ապահովման նպատակով։

«Մենք աչքներիս առաջ հայտնվում ենք Ռուսաստանի հետ տնտեսական պատերազմի մեջ, որի հետևանքները մեզ համար աննկարագրելի ծանր են լինելու։ Եվ ամենամեծ վնասները կրելու է մեր ժողովուրդը` հասարակ, ապրող, արդար քրտինքով ստեղծող մարդիկ»,-նշել է Ծառուկյանը։

ՌԴ-ի՝ ՀՀ-ի որոշ ապրանքների ներմուծման նկատմամբ կիրառված սահմանափակումների մասին

«Ռոսպոտրեբնադզորը» կասեցրել է Հայաստանից «Ջերմուկ» հանքային ջրի բոլոր խմբաքանակների, ինչպես նաև հայաստանյան երեք արտադրողների գինու և կոնյակի ներմուծումն ու շրջանառությունը Ռուսաստանում։

Բացի այդ, «Ռոսսելխոզնադզորը» ժամանակավոր սահմանափակումներ է մտցրել Հայաստանից ծաղկային և պարենային արտադրանքի ներմուծման նկատմամբ՝ մինչև ՀՀ սննդամթերքի անվտանգության տեսչական մարմնի հրավերով ռուս մասնագետների մասնակցությամբ տեսչական ստուգումների ավարտը։ Ռուսական պատկան մարմինն ունի դժգոհություններ նաև հայկական բանջարեղենի ու մրգերի վերաբերյալ։