Դպրոցների էլ․ հասցեներին կեղծ հաղորդագրություն է ուղարկվում․ ԿԳՄՍՆ–ն զգուշացնում է
ԵՐԵՎԱՆ, 7 մայիսի․/Նովոստի–Արմենիա/․ Հանրակրթական դպրոցների պաշտոնական էլեկտրոնային հասցեներին ԿԳՄՍ նախարարության հետ առնչություն չունեցող էլեկտրոնային հասցեից տարածվում է կեղծ հաղորդագրություն նախարարության հանրակրթության վարչության պետ Թամարա Սարգսյանի անունից, հայտնում են ԿԳՄՍՆ–ից։
«ԿԳՄՍ նախարարությունը պաշտոնապես հայտնում է, որ նշված նամակը ապատեղեկատվություն է և որևէ առնչություն չունի նախարարության հետ», – նշվում է հաղորդագրության մեջ։
ԿԳՄՍՆ–ից հանրակրթական ուսումնական հաստատությունների տնօրեններին հորդորում են տվյալ նամակը չդիտարկել որպես նախարարության պաշտոնական հաղորդագրություն և առաջնորդվել բացառապես նախարարության պաշտոնական աղբյուրներով ստացվող և պաշտոնական հարթակներում հրապարակվող տեղեկատվությամբ։
«Միաժամանակ տեղեկացնում ենք, որ նախարարությունը հետևողական է լինելու յուրաքանչյուր ապատեղեկատվության և մանիպուլյատիվ գործողության բացահայտման հարցում», – նշվում է հաղորդագրության մեջ։
