Այս իշխանությունների օրոք ունեցել ենք երեք պատերազմ, երեք պարտություն և ցեղասպանություն․ Թաթոյան
ԵՐԵՎԱՆ, 24 ապրիլի․/Նովոստի–Արմենիա/․ «Միասնության թևեր» կուսակցությունից վարչապետի թեկնածու, նախկին օմբուդսմեն Արման Թաթոյանը հայտարարել է, որ գործող իշխանությունների օրոք Հայաստանն ունեցել է պատերազմներ, պարտություններ, տարածքների կորուստ, իսկ Արցախի իրադարձությունները նա որակել է որպես էթնիկ զտում և ցեղասպանություն։
«Փաշինյանի գործողություններն այսօր ցեղասպանության հանցագործության ժխտողության բաղադրիչներ են։ Նա, ով առաջ է մղում «Կամ ես, կամ պատերազմ» հռետորաբանությունը, պարզապես վաճառում է մեր ինքնիշխանությունը։ Այս քաղաքականությունն ուղղակիորեն տանում է դեպի պատերազմ։ Պատերազմից խուսափելու համար պետք է հզորանալ, զարգացնել անվտանգության համակարգը»,- ուրբաթ օրը լրագրողներին հայտարարել է Թաթոյանը՝ հավելելով, որ «իշխանությունները խաբում են ժողովրդին»։
«Արբանյակային լուսանկարների միջոցով մենք ապացուցել ենք, որ 2020 թվականից սկսած Հայաստանն ամեն տարի տարածքներ է կորցրել», - Ծիծեռնակաբերդում ասել է Թաթոյանը։
Հայաստանի հրաժարումն Ադրբեջանի դեմ միջազգային հայցերից նա անվանել է քաղաքացիների իրավունքների խախտում։
Միևնույն ժամանակ Թաթոյանը հայտարարել է, որ չհրաժարվելով Հայոց ցեղասպանության ճանաչման հարցում արդարության հասնելու օրակարգից՝ Թուրքիայի հետ հարաբերությունները պետք է կարգավորվեն առանց նախապայմանների։
