Հայաստանում «խոզի գրիպի» համաճարակ չկա. փորձագետ

ԵՐԵՎԱՆ, 8 հունվարի. /Նովոստի–Արմենիա/. Հայաստանում չկա H1N1 վիրուսի («խոզի գրիպ») ենթատիպով առաջացած գրիպի համաճարակ։ Համաճարակաբանական իրավիճակը վերահսկողության տակ է, «Նովոստի–Արմենիա» գործակալությանն ասաց ՀՀ ԱՆ հիվանդությունների վերահսկման և կանխարգելման ազգային կենտրոնի օդակաթիլային վարակների և հատուկ վտանգավոր վարակիչ հիվանդությունների համաճարակաբանության բաժնի պետ Լիանա Թորոսյանը:

«Հիվանդացության դեպքերը սեզոնային վիրուսային ակտիվության դրսևորում են, որոնք գրանցվում են ամեն տարի։ Միակ տարբերությունն այն է, որ լաբորատոր հետազոտությունների արդյունքում պարզվել է, որ հիվանդների գերակշռող թվի մոտ բացահայտվել է, այսպես կոչված, «խոզի գրիպի» վիրուսը (H1N1)», – ասաց Թորոսյանը։

«Խոզի գրիպից» մահվան 3 դեպք Հայաստանում>>

Նրա խոսքով` բժիշկներին ուշ դիմելու, ինչպես նաև ինքնաբուժությամբ զբաղվելու հետևանքով հիմնականում տարեց հիվանդների մոտ «խոզի գրիպի» վիրուսը հանգեցնում է թոքաբորբի։

««Խոզի գրիպի» վիրուսը հայտնի է 2010 թ.–ից, մարդու օրգանիզմը հասցրել է սովորել այդ վիրուսին։ Այս հիվանդության շուրջ այս տարի ստեղծված իրարանցումն անհասկանալի է, իրավիճակը սպառնացող չէ», – ասաց Թորոսյանը։

Նա նաև նշեց, որ դպրոցներում ձմեռային արձակուրդների երկարացման փաստը վկայում է ոչ թե համաճարակի, այլ այն փաստի մասին, որ Հայաստանում իրականացվում են կանխարգելիչ միջոցառումներ։  

Արձակուրդները երկարացվել են, հայտնում է նախարարը>>

Դեկտեմբերի 8–ի դրությամբ Հայաստանում հոսպիտալացվել է գրիպով և սուր շնչառական հիվանդություններով տառապող 568 հիվանդ, որոնցից 461–ը 0–18 տարեկան են։ 150–ի մոտ ախտորոշվել է թոքաբորբ։ –0–