ԵՐԵՎԱՆ, 7 հունվարի. /Նովոստի-Արմենիա/. Ուսումնական տարին պետական ուսումնական հաստատություններում կշարունակվի հունվարի 18-ից, հայտնել է Հայաստանի կրթության և գիտության նախարար Արմեն Աշոտյանը:
Այդ մասին նա գրառում է կատարել
Facebook-ի իր էջում. «Հիմք ընդունելով Հայաստանի Հանրապետության առողջապահության նախարարի միջնորդությունը, տեղեկացնում եմ, որ հանրակրթական, նախնական և միջին մասնագիտական ծրագրեր իրականացնող պետական ուսումնական հաստատություններում ուսումնական տարին կշարունակվի սույն թվականի հունվարի 18-ից»:
Նախարարն ավելացրել է, որ ոչ պետական հաստատությունները նույնպես պետք է առաջնորդվեն նույն աշխատակարգով։
«Ուսումնական ծրագրի ամբողջական յուրացման նպատակով մինչ ուսումնական տարվա ավարտը կկազմակերպվեն լրացուցիչ դասընթացներ»,- նշել է Աշոտյանը` առողջություն մաղթելով բոլորին:
Ավելի վաղ հայտարարվել էր, որ ուսումնական գործընթացը շարունակվելու է հունվարի 11-ից: -0-
