ԵՐԵՎԱՆ, 28 ապրիլի./Նովոստի–Արմենիա/. Վերջին օրերին կորոնավիրուսով հիվանդության աճի տեմպը գրեթե նույնն է` 3-5% սահմաններում:
Այս մասին նշել է ՀՀ առողջապահության նախարար Արսեն Թորոսյանն իր Facebook–յան էջում։
«Աճի կորի հարթեցումը մեզ որոշակիորեն հաջողվել է: Որոշակիորեն հաջողվել է ժամանակ շահել և վերադասավորվել` հիվանդության դեմ պայքարի ավելի կազմակերպված համակարգ ունենալու համար», – նշել է նախարարը:
Загружается новость ... "Лево"
Նրա խոսքով, սակայն այդ ջանքերը դեռ պետք է շարունակվեն:
«Եվ դրանք պետք է լինեն կոլեկտիվ` բոլորիս կողմից: Մենք պետք է շարունակենք պահպանել հեռավորությունը միմյանց միջև, ձեռքերը հաճախ ախտահանենք, փակենք մեր բերանը դիմակով, երբ հնարավոր է: Սահմանափակումների թուլացմանը զուգընթաց, մենք առավել մեծ անձնական պատասխանատվություն պետք է դրսևորենք վարակի տարածումը կանխարգելելու համար», – նշել է Թորոսյանն` ընդգծելով, որ սահմափակումների թուլացումը չի նշանակում, որ այլևս վտանգ չկա վարակվելու և վարակելու ուրիշներին, հատկապես մեր տարեց և քրոնիկական հիվանդություններով հարազատներին, մեր հայրերին և մայրերին, մեր տատիկներին և պապիկներին:
Ապրիլի 28–ին ժամը 11–ի դրությամբ Հայաստանում գրանցվել է կորոնավիրուսով վարակման 1867 դեպք, առողջացումների թիվը հասել է 866-ի, փաստացի բուժվում է 971 մարդ, ընդհանուր թեստերի թիվը 19296, մահացել է, ցավոք, 30 մարդ:
Այսօր ՀՀ վարչապետ Նիկոլ Փաշինյանը հայտնել է, որ առաջիկայում սահմանափակումները կսկսեն թուլացվել, և պարետատունը հանդես կգա համապատասխան որոշումներով։–0–
