«Սասնա ծռերը» պահանջում է իշխանություններից ազատ արձակել Արցախի ԱԺ նախկին պատգամավոր Վահան Բադասյանին, նա ձերբակալվել է Փաշինյանին սպառնալու համար (ՎԻԴԵՈ)

ԵՐԵՎԱՆ, 29 հունվարի./Նովոստի–Արմենիա/. «Սասնա ծռեր» կուսակցությունը պահանջում է իշխանություններից ազատ արձակել նախօրեին ձերբակալված Արցախ ԱԺ նախկին պատգամավոր Վահան Բադասյանին, ով հայտարարել է, որ ՀՀ վարչապետ Նիկոլ Փաշինյանին պետք է վերացնել։

«Ժամ առաջ հեռանալու փոխարեն մեզ ազգային աղետի հասցրած Նիկոլ Փաշինյանի ռեժիմը կառչել է աթոռին և փորձում է բռնության ու հալածանքի ջղաձիգ քայլերով երկարաձգել իր կառավարումը։ Հայրենիք կորցնելու ցավից վրդովված կարծիք հայտնելու համար քաղաքական և ռազմական գործիչ Վահան Բադասյանին ձերբակալելը վկայում է այն մասին, որ ռեժիմը կորցրել է իրականության զգացումը և երկիրը տանում է կործանարար ցնցումների», – նշվում է «Սասնա ծռեր» կուսակցության քարտուղարության հայտարարության մեջ։

Կուսակցությունը Նիկոլ Փաշինյանից պահանջում է անհապաղ ազատ արձակել Վահան Բադասյանին, «դադարեցնել բռնության միջոցով կառավարման լծակները պահպանելու քաղաքականությունը և հրաժարական տալ՝ հնարավորություն ստեղծելով երկիրը դուրս բերելու իր իսկ մեղքով ստեղծված աղետալի վիճակից»։

Նշենք, որ Արցախի ԱԺ նախկին պատգամավոր Վահան Բադասյանը նախօրեին բերման է ենթարկվել ԱԱԾ, միջնորդություն է ներկայացվել դատարան՝ նրան կալանավորելու համար: Բադասյանը բերման է ենթարկվել ԱԱԾ՝ Եռաբլուրում արած հայտարարությունների կապակցությամբ:

Եռաբլուրում լրագրողների հետ զրույցում Վահան Բադասյանը հայտարարել էր, որ Նիկոլ Փաշինյանին պետք է հեռացնել ոչ միայն որպես պարտության սիմվոլի, այլ նաև՝ թշնամու: Ընդգծել էր՝ ինքը պատրաստ է դա անել: Հարցին, թե հեռացնելու ի՞նչ ճանապարհներ կան, Բադասյանը պատասխանել էր. «Տարբեր, ընդհուպ՝ մինչև ֆիզիկապես հեռացնելը: Այսինքն՝ դա ենթադրում է, որ թշնամուն մենք պետք է վերացնենք… այո՛, զենքի միջոցով նաև… այո՛, ես սպառնալիքի կոչեր եմ անում և գիտակցաբար եմ անում, թող ԱԱԾ-ն ինձ ձերբակալի»:–0–