ԵՐԵՎԱՆ, 20 հուլիսի./Նովոստի–Արմենիա/. Հայտնի ձեռներեց, «Քաղաքացիական պայմանագիր» կուսակցությունից պատգամավորի թեկնածու Խաչատուր Սուքիասյանի եղբայրը` Ռոբերտ Սուքիասյանը, ձերբակալվել է։ Այս մասին գրել է Ռոբերտ Սուքիասյանի փաստաբան Գոռ Միքայելյանը Facebook–յան իր էջում։
«Հաշվի առնելով հետաքրքրությունը Ռոբերտ Սուքիասյանին առնչվող քրեական գործի նկատմամբ, հաստատում եմ, որ Ռոբերտ Սուքիասյանը ձերբակալվել է և ես հանդիսանում եմ նրա պաշտպանը: Հիմնավոր փաստարկներով պնդում եմ, որ ձերբակալումն իրավաչափ չէ, և իմ կողմից արդեն բողոք է ներկայացվել դատարան», – գրել է Միքայելյանը։
Խաչատուր Սուքիասյանն իր հերթին մեկնաբանել է ստեղծված իրավիճակը։
«Երեկ Երևանի կենտրոնում տեղի ունեցած տհաճ և անթույլատրելի միջադեպն ինձ համար անընդունելի է: Հարաբերությունների պարզման նման բարքը դատապարտելի է: Թե ինչ է տեղի ունեցել իրականում, ավելի ճիշտ կհայտնեն ՀՀ իրավապահ համակարգի ներկայացուցիչները՝ օբյեկտիվ և բազմակողմանի քննություն իրականացնելուց հետո: Հայտարարում եմ, որ անկախ մարդու ով լինելուց, Հայաստանի հանրապետությունում բոլորն օրենքի առաջ հավասար են՝ անկախ սոցիալական և քաղաքական կարգավիճակից», – նշել է Սուքիասյանը։
Հուլիսի 18–ի երեկոյան Երևանի Ամիրյան փողոցում հնչել են կրակոցներ։ Ոտքի շրջանում հրազենային վիրավորում է ստացել ԱՄՆ–ի քաղաքացի`ծնված 1979թ.։ Հարուցվել է քրեական գործ ՀՀ քրեական օրենսգրքի 258-րդ հոդվածի 4-րդ մասով (խուլիգանություն) և 235-րդ հոդվածի 1-ին մասով (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը):
Նախնական տվյալներով՝ անհայտ անձինք, կոպիտ կերպով խախտելով հասարակական կարգը, բացահայտ անհարգալից վերաբերմունք դրսևորելով հասարակության նկատմամբ, ժամը 19:30-ի սահմաններում Երևան քաղաքի Ամիրյան 18 հասցեում՝ մայթեզրին, վիճաբանել են իրար հետ, հարվածներ հասցրել միմյանց, որի ժամանակ ներկաներից մեկը ոտքի շրջանում հրազենային վնասվածք է ստացել:
Հայտնի է դարձել, որ միջադեպի մասնակիցներից մեկը Ռոբերտ Սուքիասյանն է, ով իր ավտոմեքենայով հեռացել է դեպքի վայրից։–0–
