Անցնող տարին հայ մարզիկների համար հաղթանակների և ձեռքբերումների տարի դարձավ. Սարգսյան

2011թ.-ը հայ մարզիկների համար ձեռքբերումների և հաղթանակների տարի դարձավ, չորեքշաբթի հայ մարզիկների և մարզիչների պարգևատրման տոնական արարողության ժամանակ ասել է հանրապետության նախագահ Սերժ Սարգսյանը:

«Սերժ Սարգսյանը «Մրցաշրջան-2011»-ի լավագույն 19 մարզիկներին, նրանց անձնական մարզիչներին և հավաքականների գլխավոր մարզիչներին նաև հանձնել է պարգևավճարներ՝ նրանց մաղթելով առողջություն, նորանոր հաջողություններ սպորտի բնագավառում և անձնական կյանքում»,- «Նովոստի-Արմենիա» գործակալությանը հաղորդեցին պետության ղեկավարի մամուլի ծառայությունից:

Սարգսյանն իր ելույթում մասնավորապես նշել է, որ հայ  ժողովուրդն այսպիսի հետաքրքրություն չէր ցուցաբերել ֆուտբոլի նկատմամբ, ինչպես այս տարի: «Եվ նույնիսկ նրանք, ովքեր մինչև վերջերս ֆուտբոլով չէին հետաքրքրվում, հիմա արտասանում են Հենրիկ Մխիթարյանի և Յուրա Մովսիսյանի անունները»,-ասել է նախագահը:
Բացի այդ, նախագահն ընդգծել է շախմատի հայկական հավաքականի ձեռքբերումները, մասնավորապես թիմի առաջնորդ Լևոն Արոնյանի հաջողությունները:
«Այս տարի շախմատի հավաքականը հերթական անգամ ապացուցեց, որ Հայաստանը շախմատային տերություն է: Մենք բոլոր տիտղոսներն ունեինք, չունեինք միայն աշխարհի չեմպիոնի տիտղոսը: Ահա արդեն դա էլ ունենք»,- նշել է Սարգսյանը:

Շախմատի Հայաստանի հավաքականը չինական Նինբոյի աշխարհի թիմային առաջնության ժամանակ ոսկե մեդալներ նվաճեց:

Նախագահը նաև հույս է հայտնել, որ 2012 թվականին՝ ամառային օլիմպիադայի անցկացման տարում, մեր մարզիկները երկար ընդմիջումից հետո Հայաստան կբերեն օլիմպիական ոսկե մեդալ: -0-