Երևանում կանցկացվի Քունգ ֆուի աշխարհի գավաթը` 300 մարզիկների մասնակցությամբ (ՎԻԴԵՈ)

ԵՐԵՎԱՆ, 8 հունիսի./Նովոստի–Արմենիա/. Աշխարհի 17 երկրների մոտ 300 մարզիկներ կմասնակցեն հունիսի 8–9–ը Երևանում անցկացվող Քունգ ֆուի աշխարհի գավաթին, տեղեկացրեց Հայաստանի քունգ ֆուի ֆեդերացիայի նախագահ Սարգիս Հարությունյանը։

«Նախորդ տարի Քունգ ֆուի միջազգային ֆեդերացիան հաստատել է Երևանում Աշխարհի գավաթի անցկացման հայտը։ Նախադրյալ դարձավ մեզ մոտ Եվրոպայի 2018թ.–ի բաց առաջնության հաջող անցկացումը», – ասաց նա ուրբաթ ասուլիսի ժամանակ։

Նա նաև տեղեկացրեց, որ մրցավարների զգալի մասը ներկայացնում են Միջազգային ֆեդերացիայի ղեկավարությունը` մրցումների աննախադեպ որակն ապահովելու համար։ 

«Մրցավարների կոլեգիան կգլխավորի Քունգ ֆուի միջազգային ֆեդերացիայի փոխնախագահ Ֆու Մինվելը, ով արևելյան մարտարվեստների հայտնի վարպետ է` Շանհայից։ Մրցավարների թվում է նաև Ռուսաստանի քունգ ֆուի ֆեդերացիայի նախագահ, վաստակավոր մարզիչ Կամիլ Ռաբադանովը», – նշեց Հարությունյանն` ավելացնելով, որ մրցաշարի բացումը տեղի կունենա հունիսի 8–ին «Միկա» մարզադաշտում, մուտքն ազատ է։  

«Մրցումների շրջանակում սպասվում են ինչպես չինացի վարպետների շոուներ, այնպես էլ մրցաշարեր` պրոֆեսիոնալ մարզիկների մասնակցությամբ», – ասաց Հարությունյանը։–0–