Մեսսին չի բացառել իր վերադարձը «Բարսելոնա»

ԵՐԵՎԱՆ, 1 նոյեմբերի./Նովոստի–Արմենիա/. «ՊՍԺ»-ի հարձակվող Լիոնել Մեսսին հայտարարել է, որ չի բացառում ապագայում իր վերադարձը «Բարսելոնա»։

«Մի օր կվերադառնա՞մ «Բարսելոնա»: Այո, ես միշտ ասել եմ, որ կցանկանայի օգնել ակումբին: Կցանկանայի մի օր տեխնիկական քարտուղար դառնալ։ Չգիտեմ՝ դա կլինի «Բարսելոնայում», թե այլ տեղ: Եթե հնարավոր է, ես կցանկանայի կրկին նպաստել այն ամենին, ինչ կարող եմ, քանի որ սա այն ակումբն է, որը ես սիրում եմ: Կցանկանայի, որ ակումբը շարունակի աճել և մնալ լավագույններից մեկն աշխարհում»,- Մեսսիի խոսքերն է մեջբերում Sport.es-ը, հաղորդում է armsport–ը։ 

Օգոստոսի սկզբին «Բարսելոնան» հայտարարեց, որ ֆինանսական խնդիրների պատճառով չի երկարաձգելու պայմանագիրը Մեսսիի հետ, ով ակումբում հանդես էր գալիս 2003 թվականից։ Դրանից անմիջապես հետո «ՊՍԺ»-ն հայտարարեց, որ երկու տարվա պայմանագիր է կնքել 34-ամյա արգենտինացու հետ՝ ևս մեկ մրցաշրջանով երկարաձգելու հնարավորությամբ։–0–