Հայաստանում խոհարարի մասնագիտությունն ավելի շատ է տարածվում. Մամուլյան

20.10.2015, 13:31
Հայաստանում խոհարարի մասնագիտությունը վերջին տարիներին ավելի շատ տարածում է գտնում, երեքշաբթի Խոհարարի օրվան նվիրված ասուլիսի ժամանակ ասաց «Հայ խոհարարական ավանդույթների զարգացման և պահպանման» հասարակական կազմակերպության ղեկավար Սեդրակ Մամուլյանը։
Հայաստանում խոհարարի մասնագիտությունն ավելի շատ է տարածվում. Մամուլյան

ԵՐԵՎԱՆ, 20 հոկտեմբերի. /Նովոստի–Արմենիա/. Հայաստանում խոհարարի մասնագիտությունը վերջին տարիներին ավելի շատ տարածում է գտնում, երեքշաբթի Խոհարարի օրվան նվիրված ասուլիսի ժամանակ ասաց «Հայ խոհարարական ավանդույթների զարգացման և պահպանման» հասարակական կազմակերպության ղեկավար Սեդրակ Մամուլյանը։

 «Այս ամենն ինչպես մեր կազմակերպության ակտիվ գործունեության, այնպես էլ հայ խոհարարների հեղինակության բարձրացման արդյունքն է», – նշեց Մամուլյանը։

Նա նաև ընդգծեց, որ այսօր գրեթե բոլոր ուսումնարանները, որտեղ ավելի վաղ բացակայում էին խոհարարական բաժինները, ջանքեր են գործադրում` նման բաժիններ բացելու համար։ Մամուլյանը նաև ավելացրեց, որ վերջին շրջանում Հայաստանում կտրուկ փոխվել է վերաբերմունքն ազգային խոհանոցի նկատմամբ։

Նրա խոսքով` խոհարարի մասնագիտությունը բավականին ծանր է, դժվար և պատասխանատու, և նրա աշխատանքից է կախված հասարակության առողջությունը։

 «Մեր կազմակերպությունը ստեղծվել է 2007 թ.–ին, նրա նպատակն է զարգացնել և պահպանել ազգային խոհանոցը։ Մեր խնդիրն է նաև հանրաճանաչ դարձնել հայկական խոհանոցը։ Մենք սերտորեն համագործակցում ենք ուսումնական կենտրոնների հետ, աշխատում արտերկրում հայկական ազգային խոհանոցի ներկայացման ուղղությամբ», – ավելացրեց Մամուլյանը։

Այս համատեքստում նա նշեց, որ նոյեմբերի 16–20–ը նրանք Մոսկվայում կներկայացնեն Անի միջնադարյան հայկական քաղաքի ազգային խոհանոցը։

Աշխարհի խոհարարներն ամեն տարի հոկտեմբերի 20–ին նշում են իրենց մասնագիտական տոնը` Խոհարարի օրը։ Միջազգային ամսաթիվը հիմնադրվել է 2004 թ.–ին Խոհարարական միությունների համաշխարհային ասոցիացիայի նախաձեռնությամբ։ Այս կազմակերպությունն ունի 8 մլն անդամ։ Այդ պատճառով զարմանալի չէ, որ համաշխարհային խոհանոցի պրոֆեսիոնալներն ունեն իրենց սեփական տոնը։

Խոհարարի միջազգային օրվա (International Chefs Day) տոնակատարություններն ավելի քան 70 երկրներում ստացել են մասշտաբային բնույթ։ Խոհարարներից բացի, տոնական միջոցառումներին մասնակցում են իշխանության մարմինների ներկայացուցիչները, տուրիստական ընկերությունների աշխատակիցները և, իհարկե, հանրային սննդի կետերի սեփականատերերը` փոքր սրճարաններից մինչև հայտնի ռեստորաններ։

Հայկական խոհանոցը Եվրոպայի հնագույն խոհանոցներից է։ Հայկական խոհարարական ավանդույթները սկիզբ են առնում հին ժամանակներից։ Հայտնի է, որ հայերը դեռևս 2500 տարի առաջ ծանոթեին խմորման և հաց թխելու գործընթացներին։ Հայկական բազմաթիվ ճաշատեսակների պատրաստման ավանդույթները մնում են անփոփոխ։–0–