ԵՐԵՎԱՆ, 25 մայիսի. /Նովոստի Արմենիա/. Հոլիվուդյան բլոքբաստերների գործադիր պրոդյուսեր Ստեփան Մարտիրոսյանին որոշել են Ռուսաստանից արտահանձնել Հայաստան:
Ինչպես գրում է «Կոմերսանտը», ըստ նախաքննության տվյալների, հայրենիքում նա յուրացրել է Հայբիզնեսբանկի սեփականատեր Վիտալի Գրիգորյանցի 50 մլն դոլարը` խոստանալով շահավետ ներդրումներ կինոբիզնեսի ոլորտում:
Ստեփան Մարտիրոսյանի նկատմամբ քրեական գործը հարուցվել է Հայաստանի գլխավոր դատախազության կողմից 2017 թ.-ի սեպտեմբերին:
Загружается новость ... "Лево"
Աղբյուրի համաձայն, Հայբիզնեսբանկի սեփականատեր Վիտալի Գրիգորյանցը Ստեփան Մարտիրոսյանի միջոցով 2011–2013 թթ.–ին 97 մլն դոլար է ներդրել ամերիկյան ֆիլմարտադրության մեջ։
Պրոդյուսերի խոսքով, ներդրումներն իրենց չեն արդարացրել, քանի որ ֆիլմերի վարձույթը ձախողվել է։ Գրիգորյանցն իր հերթին փաստաբանների միջոցով պարզել է, որ գործընկերն իրեն է պահել ներդրումների կեսը` 50 մլն դոլար։
2017 թ.–ի հոկտեմբերին Մարտիրոսյանին հեռակա կարգով մեղադրանք է առաջադրվել ՀՀ ՔՕ 178–րդ հոդվածի հատկանիշներով (խարդախություն), նրա նկատմամբ հետախուզում է հայտարարվել, և նա հեռակա կարգով կալանավորվել է։
Արդյունքում, Մոսկվայի «Դոմոդեդովո» օդանավակայան ժամանած պրոդյուսերը ձերբակալվել է, իսկ գլխավոր դատախազի տեղակալ Նիկոլայ Վինիչենկոն, բավարարելով իր հայաստանցի գործընկերոջ հայցը, որոշում է կայացրել Հայաստանին հանձնել Մարտիրոսյանին, այդ որոշմանն աջակցել է Մոսկվայի քաղաքային դատարանը։ Գերագույն դատարանը, ուսումնասիրելով պաշտպանության բողոքը, չեղարկել է արտահանձնումը ու գործն ուղղել նոր քննարկման։
Ըստ «Կոմերսանտի», երեկ դատարանում փաստաբանները խնդրել են չեղարկել գլխավոր դատախազի տեղակալի որոշումը, իսկ պրոդյուսերին` ազատել ու հնարավորություն տալ մեկնել ԱՄՆ։
Միաժամանակ, փաստաբանները նշում էին, որ Մարտիրոսյանի քրեական հետապնդման հարցում բազմաթիվ անճշտություններ կան։ Պաշտպանության վարկածով, յուրացում ընդհանրապես չի եղել, պրոդյուսերը պարզապես որոշակի տոկոս է պահել ծառայությունների համար ներդրած գումարից։ Փաստաբանների կարծիքով, ներդրողը գործընկերոջ նկատմամբ պահանջներ է ներկայացրել, քանի որ գումարներ է կորցրել ոչ միայն ԱՄՆ–ում, այլև այլ նախագծում` Ուկրաինայում։
Մոսկվայի քաղաքային դատարանը, համարելով, որ բոլոր այս վարկածներն էական չեն, վճռել է Մարտիրոսյանին ուղարկել հայրենիք` նշելով, որ դրա համար խոչընդոտներ չկան։ Փաստաբանները կփորձեն գտնել դրանք Գերագույն դատարանում։–0–
