Գիտնականներն աղմկոտ հարևանից փրկվելու իդեալական տարբերակ են գտել

ԵՐԵՎԱՆ, 17 մարտի. /Նովոստի-Արմենիա/. Մեր ժամանակներում լռությունը ոսկուց էլ թանկ է: Ինչպե՞ս փրկվել անվերջանալի վերանորոգում կատարող հարևանից, քաղաքի աղմուկից, բարձր երաժշտությունից և հարբած խուլիգաններից:

Բոստոնի համալսարանի գիտնականները հնարել են, հնարավոր է, 21-րդ դարի ամենակարևոր և առողջ հայտնագործություններից մեկը` ձայնակլանիչ նյութ:

Այն անվանում են «ակուստիկ մետանյութ», որի մասին ավելի մանրամասն կարելի է կարդալ Physical Review B-ում հրապարակած հետազոտությունում, գրում է futurist.ru-ն: Ըստ էության, գիտնականներն աղմուկը դիտարկել են որպես մաթեմատիկական խնդիր և մաթեմատիկական կոնստրուկցիան օգտագործել որպես դրա վերացման միջոց:

«Մաթեմատիկորեն նախագծված եռաչափ մետանյութն ունի այնպիսի ձև, որ կարողանա ուղարկել մուտքային ձայներն այնտեղ, որտեղից որ դրանք եկել են», – բացատրում են Բոստոնի համալսարանի գիտնականները:

Իսկ ամենատպավորիչն այն է, որ նյութը, ամբողջովին խլացնելով ձայները, թույլ է տալիս, որ իր միջով անցնեն լույսը և օդը:

Ակուստիկ մետանյութի կիրառման տիրույթը մեծ է, բայց, կարևորը, դրանով հնարավոր կլինի ծածկել բնակարանի պատերը: Իսկ քանի որ այն ոչ միայն կլանում է բոլոր ձայները, այլ նաև վերադարձնում դրանք, ապա ձեռքի գայլիկոնով հարևանն անպայման կզգա ձեր բոլոր տանջանքներն իր վրա: -0-