ԵՐԵՎԱՆ, 20 սեպտեմբերի./Նովոստի-Արմենիա/. Մոնտեֆիորե բժշկական կենտրոնի, Փենսիլվանիայի համալսարանի և ԱՄՆ այլ առողջապահական կենտրոնների գիտնականները հայտնել են, որ կորոնավիրուսը գլխավորապես տարածվում է օդային աէրոզոլների միջոցով, ոչ թե մեկերեսների: Այդպիսով, սոցիալական հեռավորությունը և օդափոխման լավ համակարգը հանդիսանում են COVID-19-ը զսպելու լավագույն միջոցները, հաղորդում է Lenta.ru-ն :
Հետազոտողները վերլուծել են SARS-CoV-2-ի փոխանցման գործոնների վերաբերյալ ամսագրում տպագրված գիտական հոդվածները 2020 թվականի հունվարից սեպտեմբեր ընկած ժամանակահատվածում: Պարզվել է, որ չնայած որոշ հոդվածներում նշվում է, որ վիրուսային մասնիկները կարող են մի քանի ժամ գոյատևել մակերեսների վրա, իրական վիրուսային ՌՆԹ-ն շրջակա միջավայրում հազվադեպ է հանդիպում: Վարակված մարդկանց հետ շփումն ու վատ օդափոխությունը վարակման հիմնական գործոններն են:
Նաև վիրուսը հաճախ փոխանցվում է վարակման վաղ փուլում գտնվող մարդկանցից: SARS-CoV-2 վիրուսային մասնակիների քանակն իրենց գագաթնակետին է հասնում մոտավորապես մինչև ախտանշանների հայտնվելը և նվազում հիվանդության հայտնվելուց հետո շաբաթվա ընթացքում: Վարակվածների մեծ մասը չեն մասնակցում վիրուսի տարածմանը, սակայն որոշ հիվանդներ հանդիսանում են հիմնական փոխանցողնեը՝ շատ մարդկանց վարակելով: -0-